陳慧儀手揸住的香檳杯內也有啫喱花。
娛樂偵訊
唔講財經 陳慧儀搞雕花
導演陳嘉上前妻陳慧儀，由於無綫財經組大改革，做了八年節目《創富坊》主持的她跟隨大隊走人，連同在商台跟陳永陸（陸叔）一起合作的講股節目《人生交叉盤》，亦劈埋炮。
全面撤出幕前，時間可以自己掌握，陳慧儀專程飛去韓國學整蛋糕花，跟住再由越南學到去新加坡，學埋整啫喱花（ Jelly art），身邊朋友都讚啫喱靚到有如藝術品，根本唔捨得食。
淡出幕前
回復單身的陳慧儀，先後在電台及電視台擔任講股主持，一講十六年，出名有反應，試過現場直播鬧分析員同觀眾，好有火！直至今年初，她認為「夠了」，決定完全淡出。
由演員到財經主持，工作性質一百八十度轉變，人到中年，又來個大逆轉，開班教整啫喱花。離開電視台及辭去電台節目後，今年三月，陳慧儀才到越南開始學習整啫喱花。
「跟過唔同嘅老師學咗唔同技巧，重要係知道邊樣啱自己，由越南開始，之後再飛去新加坡跟另一個老師，發覺佢同我一樣癲癲哋，老師本身係律師，佢丟低所有嘢去做鑽研，佢傳授咗好多心得俾我。」陳慧儀說。
不眠不休
先愛上整蛋糕花的陳慧儀，去年試過專登飛去韓國兩次，跟隨大師級上深造班，四日一個課程，每日十多小時做過百朵花，直至掌握到竅門。由蛋糕花到啫喱花，都是不眠不休。
「我試過喺屋企練習，由朝早十點幾整到凌晨五點，我仲要由學做櫻花開始，因為櫻花難做，好有挑戰性。」
如今陳慧儀兩三下手勢，就可以完成一朵啫喱花，其實當中下過不少苦功。
「做花之前要做個底，我整過好多唔同種類嘅啫喱底，呢隻我最滿意，因為成分有超過百分之九十係海草，其餘係愛玉籽，好健康，整出嚟好似玻璃咁清，好靚。」
要求開班
學有所成，將啫喱花鋪上 Facebook後，朋友個個有反應要求開班，陳慧儀說她認識的一班財經分析員朋友，尤其踴躍。
「我問佢哋，係咪學嚟氹女仔，佢哋話唔係，亦唔係氹老婆，其實真係自己想學，我諗係減壓好方法。」陳慧儀說。
即場示範針筒雕花，左邊用爐熱住的茶杯分別放了植物及生果做成的花瓣顏料。
http://www.facebook.com/chanwaiyeevindy
不斷求變
89年港姐出身的陳慧儀，現年 48歲，跟導演前夫陳嘉上育有一子一女，離婚後，她考獲證券牌照，由演員轉到財經界講股，先後在商台開咪及在無綫主持財經節目，有火的她更試過肉緊到在現場直播期間鬧分析員。今年初，陳慧儀決定專心向啫喱雕花藝術發展，並計劃開班教授。由幕前走到今日，反差極大。
撰文、攝影、攝錄：娛樂組
|
鍾意就快D Share啦！
|
|
|