網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2016年7月3日 星期日

新末日博士:港經濟恐衰過「1997」 __,

有「新末日博士」之稱嘅大和資本市場亞洲(除日本外)股票研究部首席經濟師賴志文2年前成功預測人民幣轉勢向下,孖妹最近睇到佢嘅研究報告預測香港目前嘅經濟狀況衰過97金融風暴前,真係嚇到個心離一離。適逢英國意外脫歐,環球經濟前景未明,我哋決定搵嚟呢位「大熊人」,解構香港經濟有幾大鑊,同埋分享吓佢嘅經濟預測秘技。賴:大和資本市場亞洲(除日本外)股票研究部首席經濟師賴志文====美元勢轉強拖後腿彩兒:英國早 ...


有「新末日博士」之稱嘅大和資本市場亞洲(除日本外)股票研究部首席經濟師賴志文2年前成功預測人民幣轉勢向下,孖妹最近睇到佢嘅研究報告預測香港目前嘅經濟狀況衰過97金融風暴前,真係嚇到個心離一離。適逢英國意外脫歐,環球經濟前景未明,我哋決定搵嚟呢位「大熊人」,解構香港經濟有幾大鑊,同埋分享吓佢嘅經濟預測秘技。

賴:大和資本市場亞洲(除日本外)股票研究部首席經濟師賴志文

====

美元勢轉強拖後腿

彩兒:英國早前舉行公投,結果係落實脫歐,真係一地眼鏡碎。

Kitty:未有英國脫歐事件前,你已經出報告話香港目前嘅經濟狀況衰過九七金融風暴前,咁依家咪更加衰?

賴:英國脫歐後,英國經濟如無意外會陷入衰退,需要一段時間重新調整,成個歐洲嘅經濟亦會受影響,增長唔會好,貿易需求自然減少。英國脫歐對香港同內地更加直接嘅影響會喺匯率方面,英鎊同歐元應會經歷結構性嘅貶值,美元轉強,由於港元同美元匯率掛鈎,港元估值過高嘅問題會更嚴重,人民幣近日貶值嘅反應,某程度係唔想比美元轉強拖住後腿。

彩兒:依家香港經濟望落都幾風平浪靜吖,使唔使睇到咁灰呀?

賴:如果從個大環境睇,我哋信貸增長個周期都差唔多行咗10年,中國債務佔GDP 2.6倍係大家嘅共識,香港嘅銀行信貸佔GDP都超過3倍,中港兩地信貸過去10年來暴升,主要係由美元資金帶動,同聯儲局極寬鬆嘅貨幣政策有關,貨幣政策吹大咗個泡沬,令我哋覺得過去10年有好可觀嘅增長,帶動到好多大陸對香港零售、旅遊、貿易嘅需求,令失業率偏低。隨住聯儲局加息,所有嘢都會逆轉,如無意外上年中香港嘅信貸規模已經見咗頂,開始收縮。我哋嘅信貸喺97、98年見頂,然後用咗6年時間收縮,期間冇好日子過,間唔中有啲經濟衰退,失業率最高去到8.5%,依家就似當其時嘅環境。

Kitty:嘩,原來風平浪靜嘅表面,已經埋下暗湧!

賴:97年中嘅時候,淨流入香港嘅資金有240億美元,但截至今年1月底,呢個數高達3,070億美元。呢啲唔係實在嘅錢,係由槓桿製造出嚟嘅錢,有來有回,唔會同你談一世戀愛,拍咗10年,隨時分手。

彩兒:咁你又點睇嚟自中國嘅風險?

賴:資金淨流入令銀行體系更有能力借錢出去,香港喺97、98借咗好多錢比周邊嘅東南亞國家,今日就借咗好多錢比大陸,情況相似。依家內地嘅壞帳有幾高我唔敢想像,人民幣愈貶值,佢哋嘅還錢能力會愈低。若果啲錢還唔到,香港銀行開始受壓,當信貸變壞,外來資金可以隨時流走,簡單嚟講,最壞嘅情況可以係出現一個銀行危機、流動性錯配。

樓按佔GDP比重超1997

Kitty:過去幾年飆升嘅樓市又會唔會係另一個計時炸彈?

彩:但亦有唔少人覺得聯儲局加息速度減慢,加上依家啲人實力比較雄厚,香港樓市嘅難大跌喎。

賴:當年97年房地產泡沬爆破,單單係樓宇按揭借貸佔GDP達36%,依家係高達46%,可見依家啲人買樓唔係有能力,係借貸返嚟。失業率係一個滯後嘅指標,依家仲係只得3點幾個百分點,過多1年半載勞動力市場開始受壓,湧現裁員潮,失業率向上,會影響業主供樓能力。

港財政政策成效不彰

彩兒:咁香港有冇咩出路?

賴:香港冇咩出路架喇,一係堅持聯繫匯率,一係就棄守。棄守聯匯可以保住自己嘅基礎貨幣,但風險太大。堅持聯匯率就只可靠得財政政策刺激經濟,即係搵財爺派多啲錢,過往都睇到效用不大,只係杯水車薪。

Kitty:面對咁嘅環境,我哋呢啲小市民點算好?

賴:普通市民可以做嘅野唔多,自己盡量諗辦法保本啦,自己睇返97、98年發生嘅嘢,從一個馬後炮嘅角度諗吓應該點做啦。

=======

●同行常高估官方救市成效

彩兒:你睇到香港同內地經濟咁淡,唔怪得咁多人都叫你做「新末日博士」啦,你又點睇個稱號?

賴:我唔鍾意呢個稱號喎,「不了情」就話有新、舊啫。我曾幾何時都好牛,好似2009年嗰陣,只不過大家唔記得啫。同埋我嘅觀點係好實在,唔係亂咁吹。我唔會隨便講啲好熊同虛無縹緲嘅嘢,我會好實在咁講經濟環境有咩變化,來自邊度,時間係點,所以我唔係永遠嘅末日博士。末日博士好多時每樣嘢睇到好淡,而且講10次有9次都錯嘅。

Kitty:2014年3月嗰時你率先預示美元弱勢已完、資金大規模喺內地流走同埋人民幣會受壓,結果畀你中晒呢3個大趨勢,點解你可以準人咁多?

賴:好多做經濟分析呢行嘅人睇中國都過分簡單,從來唔覺對外收支平衡表(balance of payment)係重要,喺佢哋嘅經濟分析模型入面並冇資金流走呢個因素,只有資金流入,呢個已經係好奇怪嘅現象。第二係好多我地呢行嘅人嘅愛國情操都相當高,大部分人都傾向睇好,接近官方口徑,預期經濟下滑時有啲刺激方案,就會上返去,個思維永遠都係咁,我就唔認同嘅。條橡筋拉到咁行,始終都會斷,事實上中國嘅債務已經拉升到GDP嘅2至3倍,成個上行周期已經行左10年。

彩兒:屈指一算,你喺呢行都做咗20年,可以喺投行呢個競爭咁激烈嘅環境生存咁耐,97金融風暴、○八金融海嘯都沖你唔走,有咩秘訣先?

齋睇國策已行唔通

賴:首先一定要有獨立分析,如果分析偏頗,1、2年間啲人唔會再睇你啲嘢,大家追求嘅都係客觀、詳細、有理據嘅分析。間唔中預測出現小錯人哋可以接受,但10次有9次錯,大方向嘅野都錯就要檢討吓喇,市場好公平,你講得唔好就自然會被淘汰,好多行家嘅壽命都好短,幾年就被淘汰咗。另外分析經濟要有世界觀、宏觀思維,理解國際關係,分析中國經濟淨係睇國策已經唔行通。

Kitty:不過你言論咁大膽,驚唔驚有一日會「被消失」呀?

賴:咁耐以來我睇到人民幣咁熊,都未有強力部門畀麻煩我,真真正正做到獨立分析。老實講我都驚自身安全架,不過食得呢行飯,受人錢財,替人消災,係要維護客戶利益,預咗呢個工作風險。

-------------

「致富智庫」,領悟理財/職場智慧,一Click改變一世

http://money18.on.cc/wealth

「東網Money18」fb專頁:有討論、有分析,齊來FUN享,贏盡●你Like

http://www.facebook.com/money18


來源 source: http://hk.on.cc
鍾意就快D Share啦!