拍拍吓，附近傳來連環槍聲，見慣世面的古仔、家輝心知不妙，但仍能保持冷靜。
娛樂偵訊
巴西實景槍聲當放煙花 張家輝古天樂貧民窟搏命
《使徒行者》電影版， chok爛電視的林峯換成影帝級吳鎮宇、張家輝再加古天樂拱照釘姐佘詩曼，論卡士牌面，吸引！
暑假大片，投資方落重本拉隊飛去奧運地巴西拍外景，更深入三不管，毒販多過差佬的貧民窟開工，有日開工，古仔、張家輝忽聞附近傳來多下槍聲，正擔心命仔凍過水之際，導演竟訛稱只是小朋友放煙花，氹兩人繼續埋位拍戲。嘩！咁都得！
未出發先興奮
巴西奧運舉行在即，特色是治安無改善，寨卡病毒繼續肆虐！《使徒行者》的幕後工作人員，早在電影演員到齊前個半月，已經派出先頭部隊，飛到當地做前期準備；由於要拍爆破、槍戰，要較長的預備時間，加上要安排劇組人員進行疫苗注射，出發的日期一改再改，令隨隊出發的大細路張家輝、古天樂極心急。
「佢兩個簡直未出發先興奮，覺得嗰邊（巴西）好好玩好吸引，完全唔擔心有乜嘢病毒，只係一味催我哋快啲起行。」一名幕後工作人員說。
使百萬保護費
過往荷李活都有不少電影在巴西貧民窟取景，但礙於當地環境複雜危險，一般的動作場面都是搬回廠房進行，再作後期加工，但《使徒行者》的槍戰、飛車和爆炸場面，一律在當地實景拍攝，更是首支成功在貧民窟內拍攝的華語片劇組。
據了解，為了保護整個團隊的人身安全，電影公司安排了兩 team保鏢，古仔和張家輝兩人，已各自有四名保鏢貼身保護，單是在保安方面的支出，已百萬計。
據劇組人員指，有日古仔和家輝在貧民窟開工期間，附近忽然傳來一連串的槍聲，當大家盤算是否要散水時，導演卻安慰兩人說：「呢啲係小朋友放煙花，唔係槍聲。」講到真的一樣。
見慣大場面的古仔即場踢爆：「咪玩放煙花？」
事後古仔、家輝亦振振有詞，話團隊人多勢眾，根本冇擔心過，反而是導演承認自己有嚇親，才會訛稱槍聲是煙花響聲，等自己定啲喎。
唔敢去揼骨
除了到貧民窟取景，其中一場張家輝同古天樂對戰，亦選擇在一個奧運場館進行，也是首支在當地奧運場館取景的外國攝製隊。
片中古仔同張家輝是一對同撈同煲的兄弟，由於兩人已合作多次，有一定默契，就算古仔不時爆肚改對白，亦難唔到對方，而在戲中古仔講得最多，就是：「不如我哋一陣去揼骨。」
其實，這也是兩人的心聲。但礙於當地正經按摩的地方少之又少，加上治安差，即使有四個保鏢跟出跟入，但入夜後，大家都不敢貿然離開酒店，去玩要搵命搏，不如早啲瞓。
林峯棄權
《使徒行者》原本是為影帝梁家輝度身訂造的一套電視劇，但對方因拍電影撞斷肋骨而辭演，幕後於是重新寫過一個以佘詩曼、林峯同苗僑偉為重心的破格臥底警匪故事，劇集叫好叫座，最高 35點收視，平均收視 27點，成為大台全年收視之冠。拍板開拍電影版上暑假，由張家輝搭古天樂、吳鎮宇，有指電視劇版男一林峯原亦有份演出，因戲份已被三個影壇大哥瓜分，決定自動棄權。
撰文、攝影、攝錄：娛樂組
|
鍾意就快D Share啦！
|
|
|