熱爆娛樂: 【獨家有片】囝囝高媽咪成個頭 51歲虎媽曾華倩肉緊摸囝囝pat pat _

2016年9月19日星期一

【獨家有片】囝囝高媽咪成個頭 51歲虎媽曾華倩肉緊摸囝囝pat pat __,曾華倩,

其他影片：>>

上個月過51歲生日嘅曾華倩，近年少有現身幕前，幾乎全職照顧17歲大嘅寶貝仔林浩賢(Martin)，噚日就有讀者李先生，透過本報「爆相爆片」，分享兩母子「拍拖」行尖沙嘴海港城，期間曾華倩仲巧遇成家出動嘅陳豪、陳茵媺。噚日戴住黑超、一身casual look嘅曾華倩，略略化咗妝，皮膚唔算差，身形亦keep到，至於佢個仔Martin，冇見一排，目測身高最少6呎，高過佢媽咪成個頭之餘，甚至高過喺圈中出晒名係高佬嘅陳豪。據李先生透露，當時陳豪一家喺商場客戶服務中心問緊嘢，咁啱曾華倩同囝囝經過。眾人就寒喧幾句。李先生話：「曾華倩見到陳豪嗰陣，都有啲愕然，之後佢就好熱情咁介紹隔籬個男仔(囝囝Martin)俾陳豪識，佢一路講，一路摸個男仔條腰、又拍佢pat pat，搞到個男仔都有啲尷尬！」雖然Martin已經大個仔，但喺曾華倩眼中，似乎仲當佢係細路仔。其實早喺2002年，當囝囝Martin只得3歲時，曾華倩毅然同結婚8年嘅老公林肇基離婚，自此曾華倩母兼父職，自言係惡媽嘅佢，曾經喺大台節目《至八女人心》講過對囝囝嘅管教，係實行有鬧錯冇放過嘅態度，更教Martin若對惡媽不滿，可以對住個廁所發洩屈氣。雖然經常虎媽上身，不過曾華倩亦喺訪問中，透露自己冇辦法俾囝囝完整家庭而感到內疚，所以先將全副精神放喺囝囝身上，以作補償，而Martin亦不負媽咪厚望，成功入讀喇沙，更係一名游泳健將，喺唔少游泳公開賽奪獎。而以往成日對個仔乸口乸面嘅曾華倩，噚日同囝囝行街嗰陣，就變成四萬咁口，望住囝囝嗰陣仲一臉滿足。睇嚟華倩多年惡媽態度，終於都有軟化嘅一刻！

(圖片由讀者李先生提供)	曾華倩噚日同阿仔Martin喺海港城巧遇陳豪一家。(圖片由讀者李先生提供)	曾華倩一個華麗轉身，就叫身後嘅Martin上前同陳豪打招呼。(圖片由讀者李先生提供)
阿仔禮貌同人say hi時，曾華倩亦肉緊攬實Martin條腰。(圖片由讀者李先生提供)	只得17歲嘅Martin，成個巨人咁。(圖片由讀者李先生提供)	早年曾華倩俾人影到陪Martin去游泳比賽時，繑住手黑晒面！(資料圖片)
喺曾華倩悉心栽培下，Martin除咗入讀名校喇沙書院兼攞過唔少獎嘅游泳健將。	當日比賽上，曾華倩喺看台上一直用望完鏡睇實阿仔表現，好緊張！(資料圖片)	當年Martin滿月時，梅艷芳、藍潔瑛同黃霑都有去滿月宴。
Martin BB嗰陣，仲同媽咪一齊拍過奶粉廣告。	Martin細個嗰陣好得意！	自今年6月開始，曾華倩喺微博放咗自己大量後生嗰陣嘅經典相，懷緬一番。
曾華倩喺微博都有放佢同舊情人梁朝偉合照。	曾華倩喺微博留言話好鍾意自己呢個造型。	1983年，曾華倩拍住呂良偉拍電視劇《雪山飛狐》，飾演苗若蘭一角。