藝人劉嘉玲日前為大陸清談節目《金星秀》擔任嘉賓，與主持人金星大方分享自己嘅感情生活，包括香港初戀男友許晉亨及現時老公梁朝偉（偉仔）。
讚許晉亨紳士儒雅
喺節目中，嘉玲表示自己於1980年由蘇州嚟到香港打工，初嚟香港報到人生路不熟，好慶幸當時識到香港初戀男友許晉亨給予佢信心同支持。講到「豪門夢碎」嘅傳聞，嘉玲就話自己同許晉亨拍咗拖3年，雙方最終和平分手，並唔係外界所傳嘅畀豪門嫌棄。隨後，嘉玲又大讚許晉亨十分Gentleman，為人儒雅有風度，雖然段感情最後未能開花結果，但兩人依家都仲係好朋友。
形容偉仔曼玉緋聞「美麗故事」
另外，嘉玲又大方透露同老公偉仔嘅感情生活。佢表示兩公婆依家嘅感情好穩定，雖然大家結婚已有八年，但早就過咗所謂嘅「七年之癢」，亦已有共識婚後唔生BB。佢又謂雙方當初搞結婚儀式，其實只係想畀雙方屋企人一個交代，而自己都想正式披上婚紗。問到偉仔同張曼玉過往嘅緋聞，嘉玲就話自己其實都唔係瞭解好多，形容係個美麗嘅故事。如果偉仔曾經鍾意過張曼玉嘅話，佢都會覺得開心。
大爆當初對偉仔冇好感
嘉玲喺節目中仲大爆自己初時對偉仔其實冇咩好感，雙方合作拍戲時冇咩火花，甚至認為偉仔有啲高傲同自戀。直至喺電影《阿飛正傳》中，再次同偉仔相遇先至畀佢深深吸引，更徹底對佢改觀，仲大讚佢係一個偉大嘅演員。
視偉仔為靠山
對於主持人提及據悉1990年綁架案一事，嘉玲就話梁朝偉曾向佢表示：「這個圈子這麼複雜，不如我們離開吧，你想去哪裏，我就陪你去哪裏。」嘉玲十分感謝偉仔對佢嘅支持，又形容老公為一座靠山：「世界甚麼都沒有，又怎麼了呢？我有這個人給我靠着。他長得高矮不重要，重要的是他給我的力量。」
避談豐厚身家
至於主持人問到嘉玲有八億港幣資產嘅傳聞，佢就霸氣表示：「我不止八億，我整個人是無價的！」
|
鍾意就快D Share啦！
|
|
|
