Sammi鄭秀文噚晚紅館首場《鄭秀文Touch Mi 2世界巡迴演唱會2016》，見Sammi已然全力以赴瞓身演出，但幾乎一開場已經聲沙，高音位更唱唔到，結果多首歌曲失準，Sammi在台上更三度痛哭，為自己走音聲沙感難受，更向觀眾說：「我好痛苦。我仲有七場，可唔可以俾番錢你哋？我把聲咁樣，我好痛苦，可唔可以退錢？」其實Sammi開騷前已一直受鼻敏感困擾，連日來亦受喉嚨發炎及咳嗽影響，自言「把聲好似冇咗一半」。本月14及15日Sammi都有在fb拍片報平安，但聽佢把聲真係好沙；開騷前夕，Sammi拍片說:「把聲呢，我覺得好過噚日，咳又少咗，聽日就正式開騷，無論點都會加油加油加油，有幾多做幾多。」對自己要求極高、亦不想令觀眾失望的Sammi，所以未好番晒亦悉力以赴，但開場時Sammi已說：「噚日係好似災難咁，係咁走音，有啲高音直頭去唔到，今日喺心中就聽到一句說話，未許天色常藍，但恩典夠用，真係恩典夠用，因為把聲開咗，醫生又畀咗藥。」又事先張揚，謂今日會聲沙同走音，叫觀眾唔好介意，仲講笑話：「啲人成日問我part 1同part 2有咩分別，part2會全晚走音。」結果Sammi除咗講嘢嘅時候成日走音，唱到《薩拉熱窩的羅密歐與茱麗葉》等歌時更不時失準。Sammi亦非常肉緊，又好嬲自己唱唔到，有時對自己表現失望，即頭擰擰流淚，但見歌迷齊聲力撐，即又笑番。可惜Sammi把聲狀態越來越沙，到劉德華出場時，更已慘變男人聲。雖然如此，但Sammi完全沒有欺場，還繼續enore。之後問觀眾:「係咪差唔多喇？」觀眾即大嗌，然後Sammi再說:「你哋第一次話好!依家唱《默契》，不如你哋唱啦!」觀眾即一齊唱，但其實Sammi都有唱。呢part rundown原定Sammi要返後台換衫，不過佢最後都冇去換，而係留喺台上繼續唱《默契》，亦是最後一首歌。
| (攝影：陳俊強) | | |
| | | |
| | | |
|
鍾意就快D Share啦！
|
|
|