歌手謝安琪（Kay）宣布懷孕佗B女，跟9歲兒子張瞻湊成個「好」字，其實今年39歲的Kay「話要就有」實在難得，Kay再接受《東網》訪問時，被問到有何生B秘方？她在電話中怕醜說：「喂呀，你哋真係好搞笑，講埋啲咁嘅嘢，我真係唔知講咩好！其實我去睇中醫唔係為咗生BB，係想調養身體，因為之前做嘢太搏，身體好攰呀，我其實冇（秘方）㗎，我真係好愧對大家呀！因為好多人問我，喺我Facebook度，問我個醫生係咪專生BB嘅，我都答咗佢哋，我睇嗰個中醫唔係特登睇生BB㗎，我想調理好氣血，可能因為血氣好咗就好啲啦咁囉！就係因為咁，我醫生話多咗好多人嚟睇呀，我都擔心我就嚟book唔到醫生。」
多食天然食物
Kay又話今次如願懷B女亦跟補品無關，功勞全歸於猛男老公張繼聰。她透露可能因現時正休息中，自己可以準備食物：「我就食天然嘅嘢多，如唔飲啲糖類。好多人天氣熱咪飲好多汽水，檸檬茶咁樣，我就冇嘅，我淨係飲清水加檸檬，日日都係飲呢啲健康啲嘅嘢囉，例如食嘅嘢，就得到就買有機嘅蔬菜呀，有機嘅生果如牛果油，我食好多牛油果，都唔係集中食一樣嘢食，好均衡，乜都食，我自己比較食多啲菜嘅。」
計排卵期增擊中率
另外，Kay又大方表示有計排卵期：「我都有計自己（排卵期），咁女仔梗係會計吓周期㗎啦，純粹係跟據周期知道邊幾日係最佳時機、最適當，咁就把握時機會，其他嘢真係冇乜嘢協助。可能係張繼聰叻囉，我唔知呀，你哋走去問張繼聰好過啦，我就真係好普普通通嗰種人！不過我就真係食得健康，我都覺得我肥咗咁多，係因為食嘢吸收咗，以前食嘢三餐都好趕，依家成日慢慢食，個底子好咗囉！咦！好冇用呀，我啲貼士，對唔住呀。」
飲湯補營養
問到Kay現時可有繼續茹素？她表示：「其實我都唔係食全素㗎，我都有食海鮮。我真係唔食肉㗎，我唔鍾意食肉，依家都係，但係老人家擺好多心機，有時都想煲啲湯畀我飲。裏面都有啲肉，我都照飲唔會嘥咗佢哋啲心機，老人家開唔開心都好緊要㗎嘛，所以我都會飲湯，但我就食唔到肉㗎，真係！張繼聰就乜都食㗎，佢就好有衣食嘅，你煮乜，佢都食嘅。」
爆麥浚龍有契爺相
問到Kay有否將喜訊通知圈中朋友？她表示剛剛正式邀請好友麥浚龍做B女的契爺：「因為我覺得佢留鬚嗰個樣，就係一個契爺相，佢都好開心！除咗我屋企人，佢都係頭幾個，我好快咁通知咗佢。」
|
鍾意就快D Share啦！
|
|
|