阿人出力整意大利菜，方公就帶定白酒請大家飲，阿人仲話方公除咗係議會活字典外，如果要買酒都可以請教佢。（鄒潔珊攝）
眾人諸事
告別議會轉投熱廚房 阿人煮意菜氹女
喺議會退下火線嘅工黨李卓人，原來轉頭就走咗入去熱廚房，講緊唔係佢加入政府，而係走入去真廚房，話嚟緊會多啲操練烹飪技術，搞多啲「阿人飯局」招呼好友。
上星期三，阿人同佢嘅多年助理方約恆接受訪問之餘，仲請埋記者「食好西」，食佢親手整嘅意大利菜。佢話自己十年前開始學烹飪，原意原來係為咗氹女，想個鍾意食意粉同意大利飯嘅愛女多啲返屋企陪兩老開餐，真係廿四孝老豆。
查實阿人似乎都幾有煮食天分，冇正式拜師學整意菜，佢就話自己喺街食過嘅嘢，就會返屋企自己試煮。今次佢就整咗個意大利沙律做頭盤，有八爪魚、火箭菜、甜椒、黑醋等，同佢議會生涯都有啲似，同樣甜酸苦辣齊晒；至於之後個南瓜湯，飲落又香又滑，記者食完頭盤同個湯都飽咗一半。
《壹》仔當日順便參觀吓佢屋企，個廚房門口仲貼咗「米芝蓮」揮春，記者問阿人係咪朋友所贈，佢就笑笑口話其實係佢叫朋友寫俾佢嘅，仲要求要畫三粒星上去，咁咪即係造馬？而最好笑係已經五十九歲嘅阿人，當日煮飯原來要戴老花眼鏡，不過佢一見記者鏡頭，就即刻除低收番埋。
阿人煮意菜，只係上半場，同場仲加映黨友何秀蘭露兩手，整咗個海南雞飯實行搞 fusion，《壹》仔見阿 Cyd先用湯浸熟隻雞，再用雞油嚟煮飯，雞肉煮得不知幾滑，不過調味醬汁不幸撻 Q。記者問方約恆對二人廚藝俾幾多分，身為打工仔嘅佢就答得好有技巧︰「你見我第一個食晒就知道啦。」
之鋒毓民梁天琦 勢組宇宙最強幕僚團
新一屆立法會開鑼，議事堂內一代新人換舊人，樓上議辦就出現另一怪現象，就係會出現宇宙最強幕僚團，非建制派最少有三名幕僚或顧問，人氣肯定把炮過佢哋「老闆」。
立法會議員背後軍師一向身份低調，就算被喻為史上最強嘅「方公」，即李卓人嘅前議助方約恆，如果唔係選舉後同李卓人一齊喺台上痛哭，本身都冇人留意佢；但今屆立法會，他們受關注程度肯定大增，因為羅冠聰、梁頌恆同鄭松泰三個嘅幕僚或顧問，隨時先係記者嘅扑咪目標。呢三個議員背後嘅男人，大家絕對唔陌生，羅冠聰有黃之鋒做議助；梁頌恆就跨黨搵嚟「正選」梁天琦做顧問，而最爆應該係鄭松泰，議助會係黃毓民，毓民過去高質嘅發言，或者有機會「借屍還魂」喎。
幕僚係議員最強後盾，除咗要做資料搜集，打起拉布戰時更要捱更抵夜寫修正案，但亦因為咁，隨時比議員更熟悉某啲議題，可以左右佢哋老闆，但唔知會唔會變成垂簾聽政呢？
睇中楊岳橋人氣 公民黨惹狂蜂浪蝶
立法會選舉塵埃落定，新一屆議員呢個星期會宣誓正式上任，而政壇好戲依家亦先正式上演。據聞有部分新東泛民地區主任甚至區議員，睇中呢期公民黨氣勢如虹，尤其係同粉絲影相影到手軟嘅署理黨魁楊岳橋，於是有意轉投岳少旗下，呢班想「強勢加盟」嘅人腳，包括以前或而家嘅白鴿黨同新民主同盟中人，佢哋仲好識推薦自己嘅長處，話公民黨冇乜地區樁腳，佢哋加盟就可以補到位，仲講到公民黨有望成為泛民第一大黨，云云。
楊岳橋新東一戰，同張超雄、長毛同慢必「贏就一齊贏」，有忠又有義，但轉頭就爆出呢個講法，隨時令岳少由天堂跌落嚟，成為泛民眾矢之的，仲可能要背負「撬牆腳」呢個指控。岳少就回應話，喺兩次選舉之後，確係同某啲朋友認識深咗，可以加強合作，但入唔入黨就真係言之過早，皆因入黨唔係一個人嘅事，係成個黨嘅事，仲好謙咁話「政治一日都嫌長」，佢唔會因為依家公眾覺得佢受歡迎而沾沾自喜，只係希望泛民喺唔同位置都可以互相補位。
撰文：巫不言
news@nextdigital.com.hk
|
鍾意就快D Share啦！
|
|
|
