熱爆娛樂: 被揭發同居　俾高層照肺　李佳芯疏遠奀星男友 [壹週刊

2016年10月20日星期四

被揭發同居　俾高層照肺　李佳芯疏遠奀星男友 [壹週刊 - 1389] __,李佳芯,M1,

娛樂偵訊

被揭發同居　俾高層照肺　李佳芯疏遠奀星男友

新紮花旦李佳芯，因被讚戲好獲大台力捧，在《巨輪 II》俾吳岱融用錢掟鬧係臭雞一幕，人氣爆錶；拍住方中信、廖啟智的《律政強人》，孭飛做女一的她表現穩定，不似陳凱琳和蔡思貝，俾人狂插演技屎。

大台難得捧到人，點知李佳芯男友是 ViuTV奀星陳炳銓，兩個愛得愈來愈高調，為免鋒芒初露的花旦形象受損，大台決定出手。被余詠珊召去照肺的李佳芯，惟有急凍戀情，唔敢再與男友同居。

加簽五年換女一

今年初，李佳芯同大台加簽了五年合約，結果換取做《律政強人》女一，向一線花旦位置踏前一大步。

事業愛情兼得的李佳芯，與 ViuTV奀星陳炳銓拍拖已超過一年，戀情不是秘密，過去大台亦未有任何反對，直到她同時有兩劇出街，花旦位置愈來愈明確，加上被爆與男友在西貢同居，大台終於出手打壓。

李佳芯同陳炳銓多次被斷正拍拖，又曾經當街激嘴，如今李佳芯竟然公開話冇拍過拖，對方唔係男友，睇嚟李佳芯都好隨便，唔係男友都嘴得。

余詠珊可以一手捧起李佳芯，亦可以一手整沉她，所以李佳芯惟有聽話。

李佳芯喺《律政強人》中表現不俗，拍住方中信同廖啟智都無怯場。

在《巨輪 II》被高天鷲鬧係臭雞呢一幕，引起極大回響。

打定輸數

當年從有線帶李佳芯去大台的余詠珊，即召她返公司照肺，方丈貫徹舊式思維，藝人拍拖就會影響事業，但最主要是男方係二打六，同已經上了位的李佳芯有太大距離，一齊的話，只會被拖累，甚至女一地位不保。

「 Ali（李佳芯）等咁耐先等到擔正，佢梗係驚公司『質』番佢落去做配角所以佢同 Danny（陳炳銓）講要低調啲，呢段時間風頭火勢，大家暫時唔好見住；雖然冇講到話要分手，不過 Danny都打定輸數，預咗隨時俾人飛。」陳炳銓身邊人說。

俾大台照完肺，要同男友被迫分居，李佳芯心情勁差。

搬離男友愛巢，李佳芯搬回筲箕灣公屋。

做咗女主角升呢出了部新車，更用上自己的英文名「 Ali」做車牌。

擘大眼講大話

被公司照完肺後，李佳芯對外即與陳炳銓劃清界線，甚至否認拍拖，指雙方目前是了解階段。已經亂了方寸的李佳芯，連自己曾經被斷正同男友當街嘴嘴都忘記，擘大眼講大話。

另方面，李佳芯亦迅速由男友西貢寓所，搬回筲箕灣娘家。上星期，本刊發現她一個人揸車去到西灣河東大街，將車停在路邊講了接近半粒鐘電話後，再落車買洗頭水，素顏的她相當憔悴。

買完嘢，李佳芯就揸車直接返回筲箕灣屋企。