在劇集《降魔的》中，劉佩玥暗戀做的士司機的馬國明。
娛樂偵訊
馬國明剝衫冇格仔 劉佩玥零興趣
幾經拉鋸，馬國明先肯動筆續約留低無綫，大台立即將他的檔期塞爆，做到冇停手！上月拍完《心理追兇》，緊接是新劇《降魔的》。早前，馬明同拍檔劉佩玥在麗都灣沙灘拍外景，全日俾太陽曬住，熱到出哂汗要當眾除衫，歎慣男友伍允龍爆肌，劉佩玥見到冇格仔馬明，零興趣冇感覺。
碎料冇興趣
已經 42歲的「中佬」馬國明，形象戇實，之前在劇集《為食神探》扮仔搞笑，出盡奶力網民都唔 buy！直指與他的形象格格不入。
要收復失地，大台安排馬明在新劇《降魔的》中做的士佬，角色夠貼地，易討好觀眾！
上週三（十月十二日）下午，一身輕便裝束，孭住個斜孭袋扮晒麻甩的馬明，與劉佩玥拍沙灘外景，被太陽蒸了一日，導演一嗌 cut機，馬明第一時間歸位，在劉佩玥旁邊攤屍。休息了一陣馬明依然覺得不爽，於是一二三起，除埋件衫散熱，對住半裸 uncle Ma，平時歎慣肌男伍允龍嘅劉佩玥，只覺碎料，毫無反應。
孭二千萬樓債
續約大台後，馬明立即有錢揸手，今年初以 1,960萬元購入太古城複式連天台單位，又自稱買給屋企人住。
「馬明好孝順㗎！賺到嘅錢全部俾媽咪幫佢管理！之前明媽一話想換樓，佢就即刻周圍搵盤睇樓！呢個單位都係明媽同佢家姐揀嘅，馬明見屋企人話鍾意，就九秒九落訂！佢同我哋講過，話間屋裝修緊，裝修費要成過百萬計！不過層樓應該唔係一次過俾晒錢，因為佢話要再勤力啲接 job供樓！」一名幕後工作人員說。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
