毛玉萍與兒子俞俊材，據知父親有軍方背景。（《蘋果日報》圖片）
中環人語
「喜來登」太子女 做毛玉萍媳婦
來自上海嘅毛玉萍雖然同過氣上海首富已撇清關係，但作風依然「海派」，去年底斥資一億買咗個嘉慧園單位俾個仔俞俊材（ Eric）結婚做新居，與前特首董建華為鄰。
下個月娶新抱喺會展大排筵席，單係睇張請帖已經夠晒派頭，未來媳婦係……「喜來登」個太子女積琪蓮，不過唔好搞錯，同尖沙咀喜來登酒店冇關係嘅，係喜來登旺鋪代理個太子女啫，其父任永賢都好均真，名片上都括住（非喜來登酒店集團成員）；嗱，嫁女餅就堅係文華東方酒店餅咭，一百元正，不過以文華級數，揀兩件餅仔都可能要補水喎！
林鄭恨去大 Sir壽宴
下個月三號是政壇教父鍾士元大 Sir九十九歲大壽，幾個月前親友以及政壇徒子徒孫均隆而重之，為他安排生日盛宴，聽講政務司司長林鄭月娥早已放晒聲氣，希望能獲邀出席大 Sir嘅生日會；有時擇日不如撞日，五年前唐唐準備辭去政務司司長參選特首，大 Sir就喺十月份親往其白加道官邸面授撰寫政綱及組班意見，莫非林鄭都想藉住生日會獲大 Sir指點迷津？
全港最貴雞紅韭菜
去福臨門俾人鋸到一頸血就係理所當然，不過真係冇諗到可以食到雞血。禮拜六去九福（九龍福臨門），咁高檔嘅食肆，竟然推出特色菜——雞紅韭菜，真係匪夷所思，仲要賣一百六十蚊一客，嘩，加埋一，咪一百八十蚊？真係堪稱全港最貴嘅雞紅韭菜呀，真正扮高尚菜式。
雞紅韭菜或者豬紅韭菜呢啲平民化食品，都係街邊地踎館菜式，我估係啲闊佬踎喺街邊食怕俾人見到，坐喺福臨門食，夾住嚿雞紅，懷念以前未有能力食福臨門嘅日子咯！
個企枱仲同我講，話冇乜幾多貨，係就快手啦，唓！我梗係冇咁笨，寧願叫番個翅啷口，加啲私家嘅 XO干邑吊吓味唔過癮呀。點知原來我都跌晒眼鏡，星期六話俾我老友聽福臨門有雞紅食，佢第二日去都已經售罄！須知道家陣福臨門係「劉（大劉）落楊上」，唔鞭策吓佢哋就好難有好嘢食，有時俾一流價錢，第三梯隊嘅功架，間接都係斬到一頸血；啲老廚榮休，我都希望第三梯隊接到班！
身價最高球隊
叔李兆基以及超人李嘉誠雙雙為彤叔扶靈，三人曾經一齊往海外闖，揚名海外之作有加拿大「世博豪園」，當地人稱為「李鄭屋邨」，三位富豪更曾自組一隊高爾夫球隊，被譽為全球身價最高球隊，但打 golf要四人行，故需要搵人戥腳，昔日有幸為呢隊超級球隊做戥腳王都升晒呢冒出頭來，如新進賭王呂志和、梁錦松、鄭維健以及港燈非執董佘頌平律師，彤叔都算老懷安慰。
|
鍾意就快D Share啦！
|
|
|
