傳撻着3個月齊去尼泊爾做義工 小方做兵超蓮嗌攰：佢幫我按頸
賭王三房千金何超蓮去年底甩拖，傳失戀半年的方力申加入觀音兵大軍，日前傳出二人暗撻三個月，上星期更去尼泊爾做義工兼拍拖，其間被影到一支水兩份飲，小方更在機場為超蓮掃背摸頸調情。超蓮昨日受訪時，對此表示她當時好攰：「所以佢幫我按一按個頸」，之後否認二人相戀，但又讚小方好可靠。
■小方在李蘊囡囡的百日宴上，已對超蓮獻殷勤。資料圖片
■方力申半年前才喊住與拍拖十年的鄧麗欣分手，想不到已視超蓮為對象。
■超蓮去年底甩拖後桃花旺盛，短短一年已有不少追求者。資料圖片
賭王三房最索千金、25歲的何超蓮去年12月與台灣歌手吳克羣淚斬四年情，單身後追求者眾，先後有「富三代」霍啟山和台灣男星柯震東等。與星特別有緣的超蓮，近月被指與鄧麗欣分手半年的方力申撻着，有指超蓮的閨蜜鄧紫棋（G.E.M.）及李蘊大力做媒人撮合，本報亦直擊李蘊8月尾為女兒搞百日宴時，與超蓮齊齊坐的小方大獻殷勤，不過當時二人否認緋聞。
■超蓮上星期去了尼泊爾，有在Ig貼上在當地的探訪相。
■李蘊是超蓮的閨蜜，指老友與小方未有發生戀情。資料圖片
「佢好照顧我」有指超蓮與小方的「超力戀」已三個月，二人日前藉着去做慈善兼拍拖。事緣小方一向有幫「點滴是生命」做探訪，過往亦帶過當時的女友鄧麗欣情侶檔出力，今次他邀請了香港泳隊師妹歐鎧淳及超蓮去尼泊爾探訪災區，昨日有報道拍到二人在當地機場與大隊返港途中，安檢時小方當眾與超蓮一支水兩份飲，又幫她掃背摸頸，一時又離隊睇相調情。
超蓮昨日回覆本報否認與小方拍拖：「其實真係唔係真，唔係拍緊拖，係朋友，一支水兩份飲都唔係，其實喺山區都係各自一支水，臨入閘大家想飲埋最後一啖水，佢只係遞我支水畀我，唔係一支水一齊飲。」問到小方當眾為她按頸，她解釋：「我哋喺山區做義工係體驗人哋生活，由朝早5點，做到夜晚7、8點，真係好攰，我都唔係同佢講緊嘢，只係同一堆人講，話好攰，一陣仲要坐凌晨機返香港，所以佢幫我按一按個頸，唔係男女朋友。」
問到對小方感覺，超蓮大讚他好可靠，但只承認二人是朋友關係，沒有戀情：「佢好照顧我，但唔係男女朋友，我都講過好多次我係單身，希望可以專注事業同讀書，唔諗咁多呢啲嘢，唔係真㗎。大家都係朋友，去尼泊爾並唔係拍拖，真係做慈善去探望，如果我阿媽覺得我係去拍拖，佢都唔會畀我去！」小方也透過經理人公司代回覆：「今次他們二人都是以大使身份為『點滴是生命』到尼泊爾探訪，他們只是朋友關係。」
李蘊唔係媒人閨蜜李蘊昨否認做媒人：「超蓮𠵱家真係冇拍拖，上個禮拜佢返香港，我問佢，佢都話冇，佢一定唔會呃我。小方出席囡囡百日宴係恭喜我，佢本身鍾意細路仔，唔係追女仔先去百日宴。」提到超蓮與小方在相中有親暱動作，她繼續解畫：「咁佢哋都係單身，普通朋友都有機會做呢啲動作，所以唔覺得奇怪，唔會覺得過份親熱，人哋做義工，唔好將個焦點扭咗去男女感情上，同埋佢同小方係冇可能，我知超蓮鍾意邊一type嘅男仔，所以係冇可能。」
採訪：唐如、小米、皓騫
|
鍾意就快D Share啦！
|
|
|
