陳展鵬同胡定欣發現有記者,男方表現愕然,女方就難掩開心神情,一路保持笑容。
娛頭
獨家捕獲 飛甩 band佬 摸黑嗒糖水 胡定欣陳展鵬車廂調情半粒鐘
胡定欣同 band佬男友陳明道拍拖一年半,今年七月,公開宣布分手並重新掛牌,唔夠兩個月,已經有着落;原來陳展鵬一直吼實,第一時間乘虛而入。
9月 24日晚,本刊撞破陳展鵬與胡定欣於西貢拍完外景後同車離開,陳展鵬出動新落地不久的溝女戰車,載了胡定欣到一個位置僻靜,冇乜人經過的停車場,二人在車廂內摸黑食糖水,調情 30分鐘。
戀情處於萌芽期,陳展鵬做足本分,對胡定欣呵護備至,每日都做司機接送女友,煙癮大的他更克制地不在女友面前食煙,細心又認真!
使開助手
男女拍親熱戲,十次有九次都嘴出愛火。在人氣劇《城寨英雄》中經常狂嘴的陳展鵬和胡定欣,亦由拍劇變拍拖,兩人目前又一齊開工拍新劇《同盟》,朝夕相對,難捨難離。
上月廿四日,二人同在西貢拍外景,由中午直踩到夜晚。同陳展鵬秘交後,因為有男友做柴可夫,胡定欣已甚少自己揸車。當晚拍完外景,陳展鵬順理成章送女友返屋企。
不過,已經對咗胡定欣一整日的陳展鵬,並未有即時送女友回家,只見他將車駛到西貢一個位置僻靜的停車場,然後使開胡定欣的助手,叫對方去買外賣糖水,二人留在車廂,把握空檔,摸黑調情。
助手買完糖水回來,二人邊食邊傾,不時眉來眼去,無論男定女,各自都流露出一副含春冧樣,在車廂內足足磨了三十分鐘,陳展鵬才捨得送女友返回將軍澳天晉寓所。
煙量銳減
第二日,兩人又一齊拍拖開工,由於胡定欣宣布甩拖冇耐,加上要保護這段剛開始不久的戀情,所以二人在拍攝現場,都刻意扮唔熟,甚少傾偈交流。
不過,陳展鵬為爭取女友加分,連習慣亦有所改變;煙癮頗大的他,以前一唔使埋位便煙不離口,但當日所見,他只食過兩次煙,扯煙時更遠離胡定欣範圍,相當克制。
雖然要低調,但陳展鵬仍無法隱藏他對胡定欣的緊張,拍動作場面時,只要陳展鵬自己冇份埋位,都會借啲意行埋胡定欣附近,近距離𥄫實,以防萬一,緊張程度聞都聞到。
拍完收工,今次胡定欣索性使走助手,一臉春風,直接坐陳展鵬架車離開。
當場斷正
上星期,突然有報導指陳展鵬同胡定欣拍拖一個月,因為冇圖冇真相,所以當二人被問到是否拍拖時,大條道理死口唔認。
當日在《同盟》開鏡記者會上,胡定欣說:「唔覺得展鵬追我喎!」而男方被問到有冇同胡定欣擦出愛火花,亦扮晒寃枉:「戲入面就有。」
為避風頭,往後幾日,陳展鵬都冇再接送女友出入。九月廿九日,胡定欣開工時不慎整傷左腳,在現場的陳展鵬全程陪住安慰,又幫女友敷冰止痛,不過,當日收工卻未有親自送胡定欣,而是任由她與助手搭的士返屋企。
之後一連幾日,胡定欣都是自己搞掂,亦試過搵豹哥單立文接收工送她一程。不過忍唔得耐,十月四號晚凌晨兩點半,陳展鵬又親自車女友返天晉,發現被當場斷正後,陳展鵬表現愕然,但胡定欣則 keep住微笑,十分冷靜;女友落車後,陳展鵬拒絕接受訪問,笑笑口離開。
大把媒人
據了解,一年前拍《城寨》期間,陳展鵬已對胡定欣有好感,但當時對方同男友陳明道依然一起,加上有蔡思貝主動送上門,所以他冇採取任何行動。劇集播出後,胡定欣宣布回復單身,其時兩人經常一齊宣傳,又合唱情歌,事不宜遲,陳展鵬終於發功狂追胡定欣。
「《城寨》套戲咁受落,啲觀眾成日留言叫佢哋一齊,仲有身邊啲老死好似姚子羚、林夏薇同陳山聰佢哋,個個都撥行晒,鼓勵兩個試吓一齊。有咁多人幫口鼓勵,所以煎 Pang(陳展鵬)好快已經追到手;不過定欣初時都有擔心對方只係玩玩吓,後來發覺佢對自己好認真,所以佢都好冧煎 Pang。」胡定欣身邊人說。
拍劇變拍拖
拍劇朝夕相對,小生花旦難分情真,撻着愛火,話咁易。
洪永城、唐詩詠
13年,二人合作《載得有情人》傳出緋聞,洪永城出盡冧招,多番公開示愛,終於成功打動對方,往後,這個被形容為「不可錯過的女友」更做埋阿四,上門幫男友拖地餵貓。
撰文、攝影、攝錄:娛樂組
鍾意就快D Share啦!
|
|