同林家棟扮演夫妻的 JM，戲中親熱戲少，家暴場面反而由頭帶到尾。
探熱針
真摑冇留手 JM爆喊 嚇親林家棟
新片《凶手還未睡》未上畫， JM（文詠珊）全裸五花大綁的床照已經睇到大家嘩嘩聲，鏡頭背後一樣激，其中一幕同飾演老公的林家棟埋牙拍家暴場口， JM被對手摑到跌落地，導演嗌 cut後她繼續喊到收唔到聲，嚇親林家棟。
打到碌落地
習慣埋位前同對手圍讀、排戲的林家棟，因為大家都覺得如果事前彩排過，這場家暴戲的逼力會大減，加上 JM話明可以去盡唔使留手，家棟一埋位，就躁夫上身，扯起 JM的頭髮，起勢摑，摑咗三巴，身無二兩肉的 JM，被打到翻了一個筋斗，再跌落地。
由於導演冇嗌 cut，家棟惟有繼續做落去，拍完這一幕，家棟第一時間上前安慰 JM，但對方完全失控爆喊，整喊人的家棟邊行開邊說：「好驚呀，真係！」
JM要硬食，但家棟慶幸自己冇留手，滿足導演要求的一氣呵成，同時，他亦對 JM另眼相看，從新估量。
最終這場家暴以不同角度拍了四 take，導演多番考慮，最後還是覺得 JM跌落地一 take效果最有震撼力。
「我都幾鍾意出嚟嘅效果，最深刻係嗌咗 cut之後，自己情緒仲係收唔到，見我喊到咁，家棟真係有啲擔心同好驚打親我。」 JM說。
要啪止痛藥
在《凶》片由頭帶到尾的 JM，角色十分沉重。第一日埋位，已經要拍場嚎哭內心場面，因為擔心自己做得唔到位，即使收咗工，依然緊張到整晚頭痛失眠，忍唔住啪咗兩粒 Panadol。
同林家棟做對手，場口不是埋身肉搏，便是情緒崩潰，相對同有感情戲的許志安就舒服得多，由於 JM曾經為對方拍過歌曲《如初》 MV女主角，大家相對較熟絡，埋位不久，已經有一定默契，拍親熱場面亦不覺尷尬。
由於影片被指太過暴力、血腥，一度以三級上畫，令 JM大為失望，但經電影公司稍作修剪後，最終以 IIB上畫。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
