胡楓淌淚約亡妻來世再續前緣
胡楓（修哥）太太胡呂詠荷昨日設靈，修哥與太太相知相愛逾半世紀，痛失老伴的他昨日一臉愁容現身，直言未能按太太遺願低調處理喪事而感遺憾。憶述太太臨終時的情況，修哥忍痛向太太哽咽說：「個個人都好乖，你放心去啦，唔係你會好痛。」說畢即老淚縱橫。修哥於送給太太的花牌上，寫下情深一句「緣盡今生，來世再續」，又承諾：「我會好積極咁做人。」
資深藝員胡楓的太太胡呂詠荷本月12日因病離世，昨日於紅磡世界儀殯館設靈，喪禮採基督教儀式進行，於今日9時半舉行儀式，後移至哥連臣角火葬場火化。修哥與初戀情人太太多年來相知相惜，兩人1957年結婚，婚姻維繫至今達59年，加上修哥在圈中人緣極好，故圈中有不少好友及契仔契女。昨日除了契仔張學友、張家輝、契女林憶蓮、劉美君、斑斑、方國珊等，白雪仙、歐陽震華、黎耀祥等亦有現身並送上花牌。
忍痛告別：你放心去啦
經歷喪妻之痛的修哥一直低調為亡妻打點，靈堂中央可見修哥準備的心形花牌，花牌上寫下深情說話：「詠荷，緣盡今生，來世再續，修。」足見修哥難捨與愛妻足足半世紀的感情。自太太離世後，一直沒有公開露面的修哥昨午約五時許，在已轉任無綫企業傳訊部顧問的曾醒明及契女方國珊陪同下與傳媒見面，心情仍未平復的修哥哽咽說：「辛苦晒各位，真係好抱歉，為咗我太太，你哋咁辛苦，我太太係好有福氣，全屋企人、仔女、新抱、女婿、孫、曾孫都好孝順佢，佢臨走前全屋企人都見勻晒，我知佢個心好安慰，到佢臨終嘅時候，所有人都喺佢身邊，佢應該都好開心，佢到最後一口氣，佢係微笑嘅。」講到亡妻，修哥難掩悲慟，激動的他口震震兼眼泛淚光。
說到太太遺願，修哥說：「佢遺願係低調，唔好搞咁多嘢，我亦估唔到會通晒天，覺得好對佢唔住，所以我心係非常唔安樂，唯一安樂係佢走得微笑，雖然大家都唔捨得，全屋企人都唔捨得，不過見到佢微笑，大家都好安慰。（太太離開時同佢講咗咩？）我話『個個人都好乖，你放心去啦，唔係你會好痛。』多謝大家。」修哥說畢便轉身進入電梯，難掩淚水的他，傷心地拭淚。
「我會好積極咁做人」
修哥長子胡永康及長孫胡家俊則於較早前代表家屬受訪，胡永康說：「好多謝各位傳媒到場採訪，喺度代表爸爸同屋企人感謝各位，媽咪喪禮會低調處理。（修哥心情平復未？）爸爸依家心情平復咗落嚟，所有屋企人包括外國嘅都返晒嚟，再次多謝各位傳媒關心我爸爸，多謝各位。」胡永康透露母親因病離世，辭世時82歲：「離開時子女同爸爸都喺度，佢走得好安詳，佢有長期病，近一年身體開始有問題，身體比較差，因為併發症影響，心臟有啲事。」至晚上9時許，修哥在契女方國珊陪同下離開靈堂，問到心情是否已平復？修哥說：「我希望盡快平復，我會好積極咁做人。（完咗設靈可以放鬆？）盡量。（同太太有咩難忘事？）我依家唔記得晒」
場外混亂家輝險被撞跌
而修哥一班契仔契女亦有到場致哀，更應修哥意願一切低調，張學友與張家輝一同抵達靈堂，戴口罩的學友未有受訪。離開靈堂時，家輝因現場一度混亂，於受訪時遭人潮推撞險跌，他透露修哥表現平靜，然後便與學友同車離開。契女林憶蓮素顏低調與劉美君現身，同樣未有受訪，於晚上8時許，憶蓮與哭得眼紅紅的劉美君手挽手離開。契女斑斑則於下午5時先一步到場協助打點。
文：影視組
|
鍾意就快D Share啦！
|
|
|