【新增內容】喺7月嘅時候，吳若希被《蘋果》讀者影到同澳門闊少Alex Ho蜜遊泰國，去完返嚟就大方承認戀情，喺fb po咗同男友着住情侶恤衫合照，之後都愛得高調。過咗幾日，呢段愛得高調嘅戀情，就發生咗少少插曲。當時有讀者指吳若希係搶人男友嘅小三，Alex Ho原本有個正印女友叫Toby Sin，Alex坦白認同Toby有肉體轇轕，吳若希梗係嬲都到震，結果Alex即漏夜帶埋Chanel手袋坐直升機由澳門抵港冧女友，最後雨過天晴。以為經歷過咁多事，可以長長久久，但係兩個只係一齊咗兩個月就分咗手；喺9月19日，Jinny就喺網上宣佈分手，但當時問到分手原因，Jinny都係冇答嘅。據知Alex好鬼冧女友，拍拖冇耐已經求婚，今年初仲喺ig晒百萬支票求婚，話要養女友一世，又想佢去美國結婚生仔，甚至提出幫女友同公司解約，但偏偏篤信風水的吳若希，深信師傅所講要在2018年先可以結婚。由於Alex不停催婚，兩人為此經常嗌交，而Jinny堅持唔嫁住，兩人大吵一鑊，最後吳若希仲一時意氣嗌分手。啖氣過咗，Jinny都係唔捨得Alex，仲發現自己有咗，計番條數，嗰陣應該係一個月左右；而Alex亦都好唔捨得Jinny，就係咁，分開後一個月，就復合喇！復合未幾，Jinny就宣佈停工一年，早前仲俾周刊影到佢身在澳門疑似安胎，仲明顯谷奶。到咗今日事隔兩個月，即係分手後兩個月，今日就公開話自己有咗三個月！Happy Ending，恭喜晒！
|
鍾意就快D Share啦！
|
|
|