喺亞視時代，佢曾經係杜汶澤舊愛。兩人已經分開逾16年。佢係顏仟汶。當年兩人於亞視結緣，拍拖年多，但顏仟汶對阿澤有情有義，即使當阿澤喺亞視發展未如意，不過顏仟汶無限包容，甚至代還債項，可惜後來兩人仍分手收場。有指顏仟汶當年由玉女轉型至接拍三級電影，與情傷不無關係。後來顏仟汶靠三級片賺來的錢改行賣時裝，又開食肆，退出娛樂圈。08年同圈外人阿Lo結婚，兩公婆喺西貢經營餐廳，閒時仟汶都會上大陸登台，亦都會拍下微電影，之前喺梁卓滿執導嘅微電影《變身愛》擔任女主角。顏仟汶亦係憑住當年喺電影圈主演過幾部片，性感形象深入民心，所以喺內地都好有叫座力。不過近日有報道話，近日顏仟汶同老公阿Lo已經分開咗，顏仟汶今日透過WhatsApp強調，跟老公只係分居，而唔係離婚。顏仟汶話：「只係搬開住，未簽紙，所以法律上未離婚，只係分居。2000年我哋認識，大家相處咗16年，兩個人相處到一個位kick住，如果再共處一室嘅，會將件事情更加惡化，不過透一透氣，畀大家一啲空間。覺得咁樣做對大家日後關係更加好，好過迫埋去死角。」顏仟汶話感情嘢唔係三言兩語解釋到，暫時分開住反而大家關係幾好，而一向都好獨立嘅仟汶話不嬲都係自力更生：「自力更生不嬲都係，香港地都係公一份、婆一份。」仲話好多人都問過復合嘅問題，目前都係順其自然，亦都冇人知道聽日發生咩事，或者復合之後畀以前更加好，因為睇清楚對方重要性。自10月分居之後，顏仟汶話大家關係都好好，成日WhatsApp傾電話關心對方：「日後嘅嘢將來嘅嘢真係未知，或者畀啲時間我哋沉殿一下。」
|
鍾意就快D Share啦！
|
|
|