藝員要keep住曝光，拍劇幾乎係唯一途徑，江美儀拍新劇《親親我好媽》時，趁曾勵珍(珍姐)放大假嗰陣，暗中篤走珍姐愛將監製關永忠，據知此舉令珍姐震怒，而得罪珍姐嘅下場，當然係……冇運行。近日「坐冷板」嘅江美儀，因為棄珍姐誠投對家余詠珊，拍住麥包麥長青、阿滕滕麗名同顧紀筠個囝囝陳浚霆(Andrew)拍綜藝節目《街市遊樂團》。可惜，節目一出街，江美儀即刻成網民箭靶，有師奶網民插佢獨有嘅老牛沙啞聲，一開口煩厭兼勞嘈，但更多人插佢恃老賣老，喺節目中狂鬧做下把位嘅陳浚霆。而喺前晚(4日)節目出街嗰集，江美儀更開口夾着脷，話魚檔劏魚每日賺得嗰260蚊，又話剝蝦曬蝦乾係自甘墮落，結果觸動網民神經，狂鬧佢刻薄兼睇低人……《蘋果》噚日打俾顧紀筠，佢回應話自己未睇節目，但都多謝網民咁錫Andrew。佢話：「我平時唔會打唔會鬧Andrew，都多謝美儀佢幫我教吓個仔，咁節目有分上把下把位，佢鬧Andrew係想袋錢入佢袋啫！」問到有網民話江美儀講嘢刻薄，顧紀筠就話：「咁惡惡哋係美儀風格嚟，佢係好有大家姐嗰種feel，佢咁樣講，可能係想搞吓笑搞吓氣氛咁囉！」冇劇開，做主持又未到位，兩頭唔到岸嘅江美儀，好頭痕！網民部份意見節錄自Baby Kingdom如下：-先話魚檔劏魚咁辛苦得嗰$260，試剝蝦晒蝦乾時又話自甘墮落。其實一個社會
有高層之餘總要有基層的，可唔可以尊重吓人哋？-自甘墮落呢句，真係over咗，難聽過粗口！佢仲要坐喺魚檔夫婦面前講！-佢係咪為咗效果，係咁鬧個後生仔？有時太over，令人好難堪。-有啲人…開聲就知道佢個人修養囉！-講嘢損人不利己、刻薄，但導演又接受，失策。-每集都聽到佢講：行開啦你，真係好煩！-增加效果就搏命鬧人，叫人你走開啦，請問呢啲係咩效果，八婆上身，口臭無品！-睇咗幾集都覺佢講嘢好過份，成日鬧人態度又差。-我覺得佢好惡好潑婦feel。-佢想學肥媽，可惜未有咁嘅本事！
|
鍾意就快D Share啦！
|
|
|