近日是非纏身的藝人江美儀出席公開活動，逐一回應所有事件，坦言也不知原因，但認為不是很大的事，故也沒有驚慌。
Andrew做下靶位
對於在主持的無綫節目《街市遊樂團》中，被指說話很惡，更經常責罵顧紀筠兒子陳浚霆（Andrew ），美儀表示此乃節目風格，更謂：「係角色設定Andrew做下靶位畀我哋恰同話，如果觀眾唔係由第一集開始睇就唔知風格係咁！（你喺節目度話剝蝦係自甘墮落？）我唔係話佢哋，係講我哋幾個大食懶，如果係話舖頭就唔會咁開心畀地方我哋拍，對我哋咁好」
雖然網友不停攻擊她，但美儀未有介懷，更坦言代表節目有人睇，她謂：「我真係冇嘢，證明我戲好，我哋幾個都好錫Andrew， 佢好有禮貌同識尊重人嘅小朋友，依家個個都識佢，佢應該請網友食飯添！」
睇伍詠薇舞台劇做成點
談到去年演出舞台劇《嬉春酒店》時無禮對待監製，最終被易角，美儀謂：「我都唔知點解，可能套戲出要做宣傳（係咪同監製有錢銀爭拗？）人哋畀晒錢我，本來14場，我做咗10場，仲收多咗4場錢添，要多謝佢。（鬧過監製？）我講嘢冇尾音，好倔會畀人誤會，係要改，我呼籲大家買飛去睇，我都想睇吓伍詠薇做成點，其實單立文同陳彥行都冇做啦，唔淨係我，可能平時得罪人多，啲人針對我」更否認未支付酬勞給中介人。
否認帶隊玩投訴
對於公開道歉信，美儀透露全因早前參加了禪修活動，從中領悟到一些事，認為很多時是自己問題，她謂：「好似關永忠監製件事咁，係我情緒令人誤會同唔開心，要同大家道歉，可能因為我問題，第一次做女主角，但有好多唔開心事發生，我想講我冇帶隊投訴，早前珍姐（曾勵珍）傳短訊畀我，叫我唔好為無中生有嘅事唔開心，叫我返開公司搵佢。」更指現時正指攝新劇《同盟》。
問到被誤會可感到委屈？美儀謂：「算冇計，都發生咗！惟有之後做好啲，唔好畀人誤會，有誤會都唔想，唔好影響人。（有冇同關永忠可聯絡？）一直都有，之前喺陳曼娜個女婚宴有見，都有同佢講，佢話大家仲係朋友，叫我唔好放喺心上。」
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|