今年35歲嘅余文樂，屬圈中標青筍盤，但自從3年前同Kary吳雨霏分手後，感情一直未有着落，雖然之前傳過佢同金馬影后周冬雨拍節目嗰陣撻着，又試過同小儀傳過緋聞，不過純屬笑料一則！(新聞連結：http://bit.ly/2hes0gQ )單身日子過得耐，靜極思動嘅余文樂，早排就放聲氣，話想結婚生仔定落嚟，原來佢唔係得個「講」字，最近佢就頻頻到台灣，「蜜」會全球最大皮帶廠亞美集團總裁王東生獨生女王棠云(Sarah)。日前有讀者爆料，指余文樂早排去台灣拍《春嬌救志明》，喺一次聚會中，識到呢位做model、同時亦係「皮帶大王」千金Sarah，型男索女極速過電，發展一日千里，即使拍完《春》片，余文樂亦密密飛台灣見女友。原本戀情冚到密密實，但日前二人拍拖到朋友聚會時，當影大合照嗰陣，女方不自覺依偎男方膊頭，而男方就露出冧滋滋樣。事後呢張親暱相，唔小心俾朋友擺上網，結果無意間令二人戀情公開！大前晚，余文樂一家為爸爸慶祝生日，有指Sarah專登來港參與男友家庭聚會，當晚余文樂哥哥Alex，就開始follow Sarah嘅Ig！兩個禮拜前，余文樂喺公開活動中，講過拍拖一定會公開。不過對於同「皮帶大王」千金拍拖，佢就回覆《蘋果》話：「報料的人根本錯，個(嗰)張相只係一班朋友係(喺)台北個(嗰)時影的，我爸爸生日只有我一家人，無其他人，我都想有個女友可以帶比(俾)我爸爸見，但真係無！」問佢同Sarah有冇進一步發展機會，佢答：「唔想假設，但真係朋友！」
|
鍾意就快D Share啦！
|
|
|