天然呆嘅馬國明，今年台慶頒獎禮，佢又做咗主角。憑爛劇《為食神探》爭視帝，人到中年被迫扮cute扮無知做小丑，馬國明自己都知一定陪跑，但佢仍然執得靚靚仔仔出席頒獎禮，陪坐同戥人高興，甚至上埋台做佈景板，同陳豪張繼聰上台頒最佳女配角時，教觀眾為三位小生(中生？)慘慘，只係上台講下自己心水選擇係邊個，然後全場焦點已火速轉咗去喊爆嘅出爐女配龔嘉欣身上。但天然呆嘅馬國明，觀眾沒有忘記佢。你以為全場焦點都落喺大贏家《城寨》同陳展鵬身上？其實仲有好多觀眾mon住馬國明幾時再有天然呆一刻，其實呢啲moment唔難捕捉，但最搞笑唔係呢度，而係，當眾男星都企晒起身，熱烈祝賀陳展鵬封視帝之際，得佢，馬明一個，仲呆緊，只係同陳展鵬握一握手，恭喜一聲，然後視線放番去近觀眾席嘅電視嗰邊，呆呆不知在想甚麼。而周遭幾乎所有人，都已經擁到去陳展鵬身邊錦上添花。有網民問，唔通，馬國明搬貨太攰，唔想起身？會親自回信俾fans，從不推劇，又唔介意拍膊頭客串做「亂入王」，明知陪坐都好乖咁著得靚靚坐全晚…呢個，係馬國明。保護天然呆馬國明基金，有冇人撐？
來源 source: http://s.nextmedia.com
|
鍾意就快D Share啦！
|
|
|