今晚係無綫《萬千星輝頒獎典禮2016》，班花旦小生都悉心打扮，輪流走上紅地氈。其中憑《幕後玩家》出色演技入圍「最佳女配角」嘅龔嘉欣，就以一襲透視裝現身。嘉欣話，因為今天對佢嚟講係重要嘅一日，所以覺得自己要着得隆重啲，加上自己又大咗一歲（佢今個月5號27歲生日），有很多嘢可以試吓，所以就揀咗件透視裝。嘉欣仲話，套衫用肉眼睇可以冇咁「令」，要有啲閃光襯一襯會睇落去更有透視，而且佢件衫嘅兩側同背脊位都有大deep V，下半身又有高衩，真係好性感吓，但嘉欣竟然話自己冇黐膠紙！佢向傳媒話：「我真係完全冇黐膠紙，因為如果黐咗（膠紙）可能會黐到啲肉，望出嚟個款冇咁靚，所以就剩係黐咗兩個圓形嘅貼紙。」咁大膽？！被問到有冇預備得獎感言，嘉欣話冇：「如果真係可以攞獎，不如直接將心裏面想講嘅直接講出嚟。（會唔會喊？）我好眼淺，我諗我會喊，希望到時喊我驚喊到啲眼睫毛飛起晒，又有淚痕咁。」嘉欣亦話，就算得唔到獎自己都會戥人開心，佢話因為覺得台慶頒獎禮好似派一張成績表咁，可以鼓勵大家，因為大家都辛苦咗一年，呢個係少少嘅鼓勵，所以邊個攞獎都會恭喜對方。咁攞獎信心方面又點先？嘉欣話：「一定要對自己有信心，因為今次真係好畀心機，自己又好鍾意個角色，希望攞到」
來源 source: http://s.nextmedia.com
|
鍾意就快D Share啦！
|
|
|