唐詩詠噚晚首次同男友洪永城，以情侶檔出席新年倒數活動，同男友拍拖當出騷嘅唐詩詠，全晚如沐春風，相反，舊愛崔建邦，日前接受周刊訪問時，透露自己人生經歷大起大跌；賺到錢嗰時，生活過得好揮霍，但當跌番落嚟做PA，人工得$11,000，經濟陷入谷底，最窮嗰陣，甚至連八達通嗰50蚊按金，都要拎番出嚟用。(新聞連結：http://bit.ly/2hG6ENq )曾經原諒過崔建邦七十個七次嘅詩詠，當時就連大家都覺得邦邦唔抵幫，但詩詠仍然不離不棄，形容為「盲撐」，可惜男方仍然繼續偷食，最後詩詠下定決心分手，更感謝崔建邦謂：「感激佢，發生過嘅經歷，令我學到好多嘢，以前的經歷係一個好好嘅經驗，可以幫助我演戲嘅路，當我要演一個唔開心的角色，我可以想起我嘅經歷。」一次又一次的背叛，令唐詩詠學會帶眼識人，同洪永城拍拖之前，佢講過擇偶條件：「專一，我好堅持一定要專一，呢樣係好基本嘅嘢！我知道自己未必識睇人，不過最緊要係識得睇啱我嘅人，我知道我一定會搵到個好錫我嘅人！」講番依家……對於前度嘅「辛酸史」，詩詠噚晚喺活動上就話：「o依家間中都會Whatsapp佢，佢以前啲嘢我都知道！」問到當時有冇幫過對方，詩詠表示：「唔可以咁講，有陪過佢。人總有低潮，佢係一個堅強嘅人，相信佢可以渡過！」問佢覺唔覺得崔建邦生性咗？詩詠就答：「我覺得每個人經歷一啲嘢，會有所啓發，以前嘅嘢唔使再講啦，總之以後識得把握人生就得新一年希望佢開開心心，幸福快樂。」
| (攝影：陳俊強) | | |
| | |
|
鍾意就快D Share啦！
|
|
|