藝人洪永城（Tony）與唐詩詠亮相出席除夕倒數活動，透露首次情侶檔接倒數騷，酬勞比單拖可觀，笑指因利成便，不用再想地方倒數，還打趣表示完騷後欲與女友到湖邊散步慶祝，問到男友浪漫與否？詩詠想了片刻謂：「都可以，及格，永遠都有進步空間。」
登堂入室拜年
由於Tony喉嚨痛未有獻唱，還自嘲擔心未達水準影響觀眾高漲情緒，問到會否於台下為女友舉牌？他謂：「呢啲驚喜講咗出嚟就唔會做」談到稍後的農曆新年，Tony表示二人應該會孖住慶祝，亦會如去年般互相到對方屋企拜年，說罷即來個情深對望，甜蜜非常。
詩詠透露父親專程到來活動現場打氣，不過Tony卻一臉得戚表示已見過世伯，所以一點也不緊張，問到世伯對他印象如何？Tony笑謂：「Uncle係唔多嘢講，成日都笑口滿面，好慈祥，所以好難捉摸到佢內心諗乜，可能佢唔鍾意我㗎！」詩詠亦謂：「我Daddy鍾意睇馬明啲戲，話佢啲戲好好睇。（Tony啲戲唔好？）Daddy比較鍾意睇認真嘅戲。」
叫世伯睇自己新劇
Tony聞言即主動出擊，表示其新劇即將播出，又問世伯會否喜歡觀賞旅遊節目，問到新年會否自掏腰包請世伯去旅行？他謂：「都想，但時間好難就，得嗰幾日。」
邀唐詩詠旅行
而Tony於台上表示望新一年可以不是為工作到南美洲或北歐環島遊，笑言此願望由出世時已開始計劃，亦希望屆時可邀請女友同行，詩詠則透露今年想與父親旅行，Tony即行未來外父政策謂：「世伯想去邊度？我哋一齊去，食好住好嘅，去邊都得。」及後當詩詠獻唱時，Tony亦有向女友送花。
此外，詩詠對於舊愛崔建邦自爆昔日揮霍史，於低潮窮困時連八達通按金也要退回出來用，詩詠對此謂：「依家有時都會同佢聯絡，佢以前嘅事我都知。（有冇幫過佢？）唔可以咁講，嗰時係陪住佢，人生總會有低潮，但佢好堅強，相信可度過（依家好生性？）覺得每個人經歷咗一啲事就會有一啲啟發，事情過咗去就唔使再講，最重要係以後識得把握人生，知佢依家（經濟）ok，祝佢新一年愈嚟愈好，開開心心，幸福快樂。」
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|