依家做女人真係好艱難，就算有錢有樓有樣有身材，始終敵唔過年齡！個樣呃到人，張身份證都呃唔到自己過咗4張嘢仲係嫁唔出？自己唔擔心，身邊人都逼到你埋牆，成日畀人問候，冇壓力就假嘅。台灣第一名模林志玲年屆42歲，仲寫緊「Chiling單身日記」，成班「黃金盛女」戰友林心如同舒淇都嫁埋，就連內地「雙冰」李冰冰同范冰冰都埋舟有男友，但自己身邊鬼影都冇隻，唔心急就假！早排佢畀台灣名嘴黃子佼踢爆，手袋隨時帶住個圖章，寸爆話佢隨時Chop個印就嫁！我Nuts哥都戥佢心酸，唔通要恭喜佢係「黃金盛女」榮譽顧問咩？得番自己一個，真係無敵是最寂寞，最是痛苦！
怪你過分美麗 邊敢食天鵝肉
到咗呢個年紀，真係莫道你在選擇人，人亦能選擇你，仲等咩！佢講過不論另一半外貌背景、身高不低於1米68，最緊要錫佢就得！佢梗係講得簡單，以佢有地位、有錢、有樣、有身材唔在講，仲有雙學位學士學歷，出名EQ高、脾氣好，好似你睇舊年無端端畀陳冠希噴到一面屁，佢都可以咁大方得體面對就知完美到101分，真係只有神先做得到！嗱，林志玲正正係好多男人心目中嘅女神，但邊個會夠薑做癩蛤蟆？對住一個咁完美嘅女人，男人望吓幻想吓就夠膽啫，嚟真就驚難駕馭唉！唔通林志玲真係要隱姓埋名，搬去津巴布韋呢啲冇人識自己嘅地方先嫁得出？
林志玲未嫁，唔係佢唔想嫁，佢直情粉身碎骨兼奮不顧身火速去嫁！早排佢話N年以來嘅心願係生一對仔女湊成個「好」字，心願喎？通常係指啲唔係咁易實現嘅理想，依家講到「生B」等於「心願」，就知佢有幾飢渴同言承旭復合？佢話「要看對方怎麼想」，即係𢱑復合底牌咪即係「求嫁造人」囉！呢「蕉」夠晒絕呀！言承旭只可以硬食，唔通喺13億人面前Say No話唔想同你過人世咩？林志玲醒呀！食回頭草分分鐘快速達成生B結婚計劃。
食回頭草 實行一箭雙鵰
林志玲連埋初戀都只係拍過三次拖，即係初戀＋言承旭＋邱士楷同萬年舊愛言承旭糾纏咗十幾年，包唔包括肉體自己諗衰在Timing唔啱，仲殺出個程咬金「馬桶大王」邱士楷，聽個朵就知有幾咁把炮，啲馬桶多到可以掟走言承旭，點知最後連自己都沖走埋！千帆過盡，還是覺得你最好，況且林志玲始終都係相信世上有童話，佢曾經眼濕濕咁話：「不知道將來我生病，是不是有人能陪同？當我老了、醜了也願意一直陪着我！」即係高潮免問，最緊要一齊走過人生低潮！當年策騎墮地受傷，邊個預咗畀人影、冒住畀公司照肺斷送星途嘅風險都要仆住去醫院探佢？咪就係言承旭囉！記得佢出過本寫真書《9314男人&男孩》講過：「公主生病的時候王子在打仗，王子說他不管了，他要放下戰爭要逃亡去看公主。」與其要博一鋪周圍搵，不如搵番個有質素保證、有感情嘅舊相好，唔使嘥時間了解摸索！一嚟可以搣甩「拜金女」污名，二嚟可以圓咗心願結婚生仔，一箭雙鵰！
就咁喺Google Search吓，女人更年期一般係指45至55歲，依家40歲前已經有機會冇M come！No M No Chance！有另一個M即係Money都未必搞得掂！進入生B倒數階段，分分鐘「求嫁生B夢」變「盛女停經夢」！仲話想生兩個，唔通仲嘥時間慢慢扮矜持等人追、拍吓拖了解吓咩？唔使旨意諗過二人世界㗎喇！歎得嚟先生B都50歲，言承旭都驚有心無力啦，點同你啤兩件出嚟呀？不如「先孕後婚」，又或生仔結婚雙線進行，時間無多，閃婚又閃孕
|
鍾意就快D Share啦！
|
|
|