陳雅倫搵到深愛另一半，恭喜恭喜！
恭喜！恭喜！50歲陳雅倫（Ellen）將與男友Martin拉埋天窗，身在北京的她接受東網記者的電話訪問，大方承認婚訊，表示自己好開心，將會在雞年結婚：「時間仲未確定，因為依家忙緊拍戲。」陳雅倫又大爆Martin來頭不少，係吳彥祖表哥：「吳媽媽同Martin媽媽係親姊妹，男友喺美國長大，讀完書後返港幫運動品牌工作，經常要香港北京兩邊飛。」問到Ellen點樣識到男友？她說：「係喺北京做嘢時識到，大家都有common friend，朋友介紹下認識，不過男友已經返香港自己搞生意。」
男友追求攻勢強勁
陳雅倫又謂其實早於與舊愛音樂創作人黃尚偉分手後，已冇憧憬愛情，只想自己，冇諗其他嘢，直到Martin的出現，冇諗過雙方咁夾，呢啲係緣分。她又大讚Martin追求強勁：「佢係我識嘅男友中最細心、發動攻擊最勁、最有條件嘅一個。」問到見晒家長未？Ellen說：「已經見晒，媽媽好鍾意未來女婿。（婚後生活？）婚期未定，唔擔心會嫁雞隨雞去美國，因為男友喺香港做嘢。（依家分隔兩地？）唔擔心，北京同香港唔係太遠 ，佢冇嘢做可以去北京，我都會嚟香港搵佢。」
其實陳雅倫與Martin的戀情早已有迹可尋，Ellen早於今年1月已在朋友圈不斷放閃，兩人戴上情侶眼鏡頭貼頭合照，而2月頭時Ellen更晒床照，講出自己心底話表示50歲只想活得快樂，意外係估唔到，應該就係講緊男友喇！
來源 source: http://hk.on.cc
|
鍾意就快D Share啦！
|
|
|