港青阿偉和友人合資在旺角經營性商店，他說近一年旺角真的多了很多同類店鋪，但競爭太大，有些店鋪開張數個月已關閉。
壹號專題
潮男潮女性淘金
性，對這一代年輕人是很直接的事，性商品，也不是停留在我們觀念中，只是大叔大媽的調情用品，現在反而更多是年輕人的日常用品。
當游蕙禎大呼「冇地方扑嘢」之時，其實也側寫了年輕一代性愛跟吃飯一樣普通。更多人喜歡用，就自然有商機。
近幾年，性用品行業也起了一場大革命，由以前的「工具性」用品，變成更多的「潮流性」用品，大批九十後的年輕人，也走進這個性愛行業淘金，除了在社交平台開網店，更多的還在鬧市旺區開鋪賣性用品。年輕人開性商店，一下子成為新一代的潮流。
年輕人開性商店，也有其特色，就是用「推銷護膚品」方法的第一身試用，吸引少女使用，或者「以愛情導師」身份，指導毒男如何提高快樂指數。
走進這股性用品熱潮的淘金者，什麼人也有，寫字樓會計文員、私人屋苑會所職員、電工工人，甚至連落選港姐也有，其實還有很多很多……。當中有人月賺十多萬，有人年多時間開兩間分店，但亦有很多人開了數個月便支撐不了關門結業。這個浪潮，有人歡喜有人愁。
究竟這個性熱潮是否真的這麼容易賺錢，本刊走訪了多間性商店，他們各自有自己的故事，亦各自有自己的觀點。但無論如何，性用品這門生意，無論投資者還是客源，都變得年輕化。
旺角多了七成
「我都覺得近一年多咗好多性商店，大概多咗百分之七十。而且開鋪嘅都係年輕人，好似有啲剛畢業，幾個朋友在網上看到多人討論，覺得有商機就合作一試。」本身做電工的阿偉（二十七歲），三年前跟兩名朋友合資三十多萬，在旺角兆萬中心開性商店，他說香港愈來愈多年輕人開性用品店鋪。
多了年輕人走進來，阿偉覺得可能是太多相關網上分享及媒體報導，覺得這門生意很易做，「好多九十後嘅年輕人，覺得打工無發展，就想出嚟創業，見到有人做得成功，於是就一窩蜂開鋪。」網上開店可以不用成本，有人訂貨才去入貨，加上性用品較吸引網上收視，推銷也較容易。
最重要是，現在的年輕人性觀念較開放，接觸性的機會也比較多，所以不會介意買性玩具跟伴侶玩。
兩個月就執笠
年輕人做這門生意，阿偉會覺得還有一個優勢，「好似有年輕客人入嚟，如果見到係一個阿叔或阿姐睇鋪，大家唔同時代好難溝通，又或者對住阿叔阿嬸會怕醜唔敢問。我哋嘅優勢，係令到年輕客人無咁拘謹，乜都傾得。」他說年輕人更會懂得利用不同的社交平台去推廣店鋪，各出奇謀去吸引年輕客人，「我哋會搵啲 Ig女神幫手，叫佢哋上嚟『打卡』再上載，都會吸引好多粉絲睇，睇完上嚟幫襯。」
多人開鋪，使更多人覺得有商機，蜂擁入市，卻說生意並非易做，結果又有很多間倒閉。「關鍵是客人不是傻的，好多人以為入大陸貨，一蚊就可賺十蚊，其實好多客係喜歡日本貨，感覺都唔同。」而且，不是每件貨品都會大熱，關鍵是看店主如何在網上推銷。
阿偉估計也有三、四成的店鋪，這幾個月因為支撐不了而結業。「有啲開兩、三個月，甚至只開了一、兩個月就玩完。佢哋多數租一啲短期租約人流少嘅商場，幾千蚊租金，但最終都係無生意而執笠。」這股性熱潮，競爭原來十分之大，要淘到金並非易事。
阿偉說這一行其實不易做，單是向某些日本公司訂貨已十分困難，「佢哋要查清係咪真係有呢間實體鋪，店鋪嘅信譽同評價係咪好，因為佢哋賣產品俾你，都唔想你間鋪品評差，影響佢哋聲譽。」他們花了兩年時間，才得到某些日本公司信任，願意供貨給他們。
好多毒男幫襯
入貨難，留住熟客也很重要，「因為客人會同朋友互相交流，一個客人可能會帶幾個朋友嚟。」阿偉說客人多是年輕人，當中不少都是沒有拍拖的毒男，「所以最多男人買嘅，都係男性自慰膠，每個月最少賣幾百包，多數係毒男買，佢哋無女朋友嘛。」
對付毒男，一定要投其所好，跟他們講漫畫講打機，「佢哋仲會 WhatsApp我哋，問邊種產品最舒服，好得意㗎。」為了留住一班毒男客，阿偉還請了一個靚女店員駐場，變成生招牌。「因為毒男好少跟異性傾偈，突然間有個異性同佢哋講性，可能會開心啲，會成日嚟，買產品反而係其次。」
阿偉表示，性商店並不如外界想像般本小利大容易發達，「可以有好少少嘅生活，但唔係賺得好厲害。」他說每件貨大概有五十至一百巴仙利潤，但也要看匯率，日圓低水時，利潤便高一點，「試過最多一個月賺十幾萬，平時都有六、七萬嘅。」他和拍檔也想過開分店，但要小心考慮，「一來競爭大，二來依家鋪租真係好高，要計清楚先。」
落選港姐奇招吸客
「其實我有諗過係咪因為我嘅關係，因為有好多傳媒訪問我，佢哋年輕人可能睇見我做得唔錯，於是跟住做。」一二年落選港姐、 TVB前藝員楊雅斯（ 30歲），自信地說懷疑這股性熱潮，或多或少由她帶起，因為她已開了三間性商店。
未有鋪頭前， Cindy（楊之洋名）已和男友在 Ig代購不同貨品，其中性用品最好賣，「佔中時，發現先達有間鋪平租五千蚊，索性開間鋪嚟實地擺貨。」落選港姐賣情趣用品，令人無限遐想，生意出奇地好。一五年，她先後在銅鑼灣及旺角信和中心開分店，因而被網民稱為現代「性女」。
拍片教人縮陰
做過藝員，當然懂得宣傳，她見很多 blogger上網介紹化妝品，更喜歡拍片擺上 YouTube，於是把性商品當作化妝品來推銷。「因為好多人經常問我性用品問題，我答到口水都乾，不如拍片擺上網啦，客人就知道點揀。」例如下陰太乾，用什麼潤滑產品會很好，介紹手法如同化妝品，女性網友喜歡之餘，男網友也大感興趣。
落選港姐教你用性玩具，每條片也爆紅，「『飛機杯』條片五十幾萬人睇，嗰個月呢樣產品賣清光，入貨都入唔切。」「縮陰球」的短片，點擊更超過一百萬，「好多媽媽級女士，睇完之後都嚟幫襯，賣咗四、五百個。」網上真人騷，令她賺到盆滿鉢滿。
她覺得這行業是有潛力的，但要看經營者怎樣去做，「我覺得潛力唔係市場，而係經營者點去搵一個產品，令客人會買嘅。」如果她覺得某種貨品會熱賣，她會押重注，「我會投資數十萬攞個總代理嚟做，買起整批貨，唔俾其他人賣，亦唔會批發俾其他人。」
行家針對報警
近一年，她看到很多年輕人在旺角開性商店，但很多都是失敗，「我經常都話，做事無心機無宗旨，你嘅貨品就無賣點，無代表性。」
她看到很多行家因為沒有生意，索性關門不開鋪，「門口寫住：『店主外遊休息七天』。」亦因為這關係，她承認不少同行眼紅她，除了經常在社交網站批評她外，還試過有警察上門，「有人報警話我間鋪賣四仔鹹碟，好過分囉。」
現時每間鋪每月約有十萬元利潤，「都滿意㗎，但仲可以有上升空間，要把握時機同花多啲心思。」她說因為這門生意，令她在去年終於成功「上車」，買了一個五百多萬（付四成首期）的市區新樓盤，「係一個神話，改變咗我一生。」
文員仔三十萬開鋪
二十七歲的 Vincent，以前是一名會計文員，專幫性玩具製造商核數，所以對性用品有一定了解。六年前，他決定自己做老闆，選擇了賣性用品，「熟悉嘛，做生意一定要對產品了解同識計數。」頭一年他先做網店，發覺有一定客源後，便投資三十多萬在旺角開了一間百多呎的樓上鋪。
他看好這門生意，因為香港的性觀念愈來愈開放，「隨住資訊發達，多咗人願意接觸性用品。」時代愈進步，令更多人接受去性商店，「依家年輕人好早熟，以前嘅人睇鹹片要買 VCD，依家上網就有，有格仔無格仔都有。年輕人早熟，對性會好奇，自然多人買性用品。」他說現在的性商店，客人多是二、三十歲的年輕人，「震蛋、按摩棒同安全套，都係比較多人買。」
唔係咁易賺
由於是樓上鋪，所以不會有太多生客自己跑上來，「人哋嚟旺角買波鞋，唔會突然上嚟買性玩具，所以多數做熟客生意。」 Vincent說現時每月扣除所有開支後，大概有三、四萬元盈利，他覺得中規中矩，「對比起出去打工，算係一個幾好嘅數字。」
對於不少九十後年輕人湧進性用品行業淘金，他覺得這班人只看到有些人好像很成功，被一些假象蒙蔽了，「一年可能開好多間，但其實都倒閉咗好多，只係大家唔知。班年輕人見到有人開分店，以為好易賺錢，其實我可以講唔係咁囉。」他提醒一些年輕人，做生意要對該行業有所掌握，不能為跟潮流就貿貿然去開鋪。
轉型開網店
「始終網店成本唔高，可能會吸引年輕人，好似我哋呢啲九十後，去嘗試做吓小成本生意，唔使做一份普通工作咁大壓力。」二十一歲的 C朗，正職是某私人屋苑會所職員，下班後就做網上生意賣性用品，「最主要呢門生意唔係成行成市，而且性係生活上不能缺少嘅必需品，所以會有得做。」
C朗一直覺得這行業未飽和，中學畢業後，就用自己積蓄和向家人借錢，投資十多萬在荃豐中心開性商店，可惜選錯鋪位，「位置比較麻煩，店鋪旁邊係一間兒科診所，門口經常有好多小朋友同師奶，所以好多客人覺得尷尬，唔敢入來。」做了一年後業主加租，他便索性結業。
旺季月賺四萬
他其後轉做網店，卻發現更自由，也吸引了另一班怕醜男，並發覺營業額比之前做實體鋪還好，「我嘅網上生意都頗受男客人歡迎，因為有時男客人係想買，但唔敢去性商店，驚俾人指指點點，所以喜歡約出來交收。」他說現在平均每日都有兩、三單生意，每件貨品大概五至六成利潤，「旺季每個月都會賺到三、四萬，淡季都有萬零蚊，都 OK，就算突然俾人炒咗都唔驚，哈哈哈。」
至於會否再開實體鋪， C朗說暫時未有這個打算，「始終依家真係多咗好多人開性商店，競爭大兼租金貴，所以一定唔會隨便開鋪。
徘徊個半鐘先敢入
十八歲的阿 Ken坦言，因為要解決生理需要，所以不時到性商店買自慰用品，「男人總要發洩，有女朋友就唔使嚟幫襯啦。」阿 Ken說平均一個月來一、兩次，有時會和朋友一同前來。他說第一次到性商店，緊張到不敢入來，「經過門口覺得好得意，但又驚俾熟人見到，來來回回兜咗一個半鐘先敢入。」他又說，買的性用品體積不會太大，「行出門口已經多人望，返到屋企又容易俾家人發現。」
任職倉務員的阿基（二十六歲），就覺得無論男女到性商店購物，是十分正常的事情，不用大驚小怪，「每個人都有自己嘅需要同喜好，會有人覺得我係毒男，但我唔會理人點睇。」
而做舞蹈教師的 Jennifer（二十三歲），就覺得性用品只是玩具，只是給成人玩而已，她還不時跟女性朋友分享買性用品的經驗，「有時朋友生日，都會買唇膏形嘅性玩具做生日禮物。」她又說都會買一些性用品，增加和伴侶的「情趣」。
撰文：程志康
攝影：韋平＆泊夕＆海江田
news@nextdigital.com.hk
|
鍾意就快D Share啦！
|
|
|
