禮拜尾天氣勁潮濕，據天文台預報，連續三日相對濕度高達100%，有人話濃霧當中，一片「仙氣」好有意境，不過費清最怕潮濕天氣，事關屋企勁潮濕，令人周身唔舒服，睇到天文台預測，費清立即預備抽濕機，以便隨時出動，對抗「仙氣」瀰漫。為咗放工返到屋企時，唔使俾潮濕「仙氣」籠罩，費清返工前習慣開咗部抽濕機「抽水」，不過有同事聽到費清呢個習慣，即時話一定要熄機先可以出門口！否則隨時有家歸不得，事關不適當使用抽濕機，隨時有意外，搞到光燭，好危險。新聞都不時有報道，長開抽濕機導致火警嘅事故，人命財物損失可大可小，其實根據機電署建議，使用抽濕機，外出前要切記關掉電源，如果抽濕機長時間無使用，應該先檢查機件才開機，若有不尋常情況，例如盛水器皿有水溢出、異常聲音等，要立即停用。使用抽濕機時，應放在平穩位置，出風口、吸風口不可被阻擋，確保有足夠空間俾部機散熱，亦唔好長時間運行，以免機件過熱，機電署提醒，抽濕機唔好放置浴室內，最好獨立接駁一個固定插座使用，否則隨時火災，而且最好係按照說明書指引使用同保養，咁用抽濕機都唔使心掛掛。＃要生計，也要生活＃毋忘初衷
來源 source: http://s.nextmedia.com
|
鍾意就快D Share啦！
|
|
|
