雖然朱慧敏自稱單身，但從她跟「前度」 Eddie一起的笑容，就知日子過得有幾甜。
娛樂偵訊
約會斷正 朱慧敏 Eddie暗復合
35歲的朱慧敏，最近被發現繑實斯文新歡在銅鑼灣高調拍拖；事後當事人辯稱男方只是她的表弟。 15年未婚夫 Eddie（彭懷安）衰溝女導致朱慧敏決定悔婚後，她一直自稱「單身」，但其實兩人掟煲唔掟蓋，關係糾纏不清，更多次被拍到撐枱腳。
月前，本刊又拍得二人在銅鑼灣白沙道開飯，雖然朱慧敏強調見面是談公事，但春風滿面的她，行街食飯多以 Eddie為伴，關係非比尋常。
安插電燈膽
當晚所見，朱慧敏與 Eddie齊齊現身銅鑼灣利園，雖然二人刻意加插多一個電燈膽同行，但朱慧敏與「前度」總有說不完的話題，身旁的女友人完全插不上嘴。
一行人去到白沙道一間餐廳食晚飯，醒目的 Eddie瞄到記者，立即安排朱慧敏坐到餐廳最角落的位置，而自己則選擇坐背門位置，十分避忌。
席間，朱慧敏心情看似不俗，不時對舊愛甜笑，開飯兩小時才離開。
公事做擋箭牌
當記者上前問兩人是否約會？朱慧敏不停解釋。「我哋剛剛去完鋪頭，傾公事呀……嚟緊會做好多優惠，而且我哋打算開第七間鋪……」
此時， Eddie亦尷尷尬尬幫口︰「係呀！嚟打邊爐吖！今日做（優惠），新鋪喺九龍灣展貿……」其實華星冰室還有其他股東，但每次都得他們兩個傾公事！橋唔怕舊，最緊要啱用。
神心陪修佛
離開大台後，朱敏慧近年以返大陸工作為主，但返到香港，又經常約會「前度」，可見兩人關係依然密切。
對於復合，朱慧敏總為自己留一線。「依家單身冇拖拍，但學佛令我明白世事無常，順其自然囉。」
據知， Eddie為箍煲，不但修心養性，更陪埋朱慧敏修佛食齋，「前度」咁神心，朱慧敏心軟，在所難免。
口是心非
朱慧敏同 Eddie拍拖，到前年宣布甩拖至今，五年來拖拖拉拉，二人不時被發現行孖咇，口是心非。
拍拖唔認
12年，兩人被發現孖住行唱片鋪，之後朱慧敏又被影到在「華星冰室」陪 Eddie收鋪，戀情爆出，但二人仍否認拍拖。
關係公開
地下情兩年， 14年朱慧敏入股男友的新店「華星客棧」，以老闆娘身份落鋪打點，公開情侶關係。
婚事告吹
戀情浮面， 15年初二人宣布翌年二月結婚，豈料男方卻因偷食「長腿 G.E.M.」陳惠敏斷正， Eddie被朱慧敏降呢由未婚夫變朋友，婚事告吹兼分手。
否認復合
二人均自稱回復單身，但又不時被發現撐枱腳，出雙入對跟一般情侶無異，不過二人仍打死不認翻撻。
撰文、攝影、攝錄：娛樂組
|
鍾意就快D Share啦！
|
|
|
