張栢芝多年來都與「是非」扯上關係，就算如普通人一樣行街Shopping，都會屢被醜化，有指她揸靚車是「土豪」又話她跟髮型屋職員狂噴口水，在「三八婦女節」收到如此「大禮」，一向對負面新聞都會保持緘默的她，決定在這個婦女節日發聲還擊，她接受東網訪問時，不慍不火地先對負面新聞逐一回應：「話我去髮型屋同職員噴口水，其實咁多年畀網絡世界已經調整得樂觀咗，好多嘢冇乜所謂，但係髮型屋嘅職員其實係陪住我出埠工作嘅團隊人員，大家已經係朋友嚟，我唔想我朋友嘅媽咪見到個女話畀個明星用口水噴，我作為媽咪，會明白係好心痛嘅事，普通傾偈寫成咁，對我團隊嘅人唔係咁公平。」
對於被指「土豪」，栢芝則表示：「其實我覺得人與人之間係平等嘅，唔應該用『土豪』字眼去形容任何人，我喜歡車，揸架好啲嘅車唔係乜嘢新奇嘅事，唔明點解今日就要用土豪嚟形容，同埋唔明焦點成日放喺我度，會唔會唔係咁公平？係咪故意針對呢？！其實我有小小愕然，點解有我嘅負面消息嘅同時，又有一啲唱好某位男仕嘅消息出現呢？我唔會開名，唔想畀人攻擊，自找麻煩，但點解人哋屋企揸架車五百幾萬，就冇人話土豪？其實點都好，可唔可以唔好提我個名，究竟係媒體針對，定係某啲人（針對），我都仲懷疑緊，唔知究竟係乜嘢事。」
有仔萬事足
栢芝直言對針對自己的「負聞」，一向都保持沈默，但覺得「三八婦女節」，女人應開心收禮物，而不會是收「負面新聞」作禮物，所以決定發聲：「其實咁多年我都已經懂得自我安慰、睇化咗，唔知邊個Party送畀我嘅大禮都好，個禮實在有啲大，下年可唔可以唔好送畀我，今日我同大仔（Lucas）去學校嘅野外旅行，佢送咗條藍手鍊畀我，我只接受仔仔呢份禮物，其他嘅，真係唔使客氣！」
仔仔生性 栢芝感安慰
談到兩位兒子，栢芝即甜在心裏，不少接觸過Lucas、Quintus的人都知道，兩位小朋友很有禮貌及乖巧，媽媽當然功不可抹，問栢芝會否擔心負面新聞會影響兩個兒子？栢芝表示：「冇擔心，兩個仔仔乖，我唔敢講係我嘅功勞，係上天畀咗一個好好嘅底子佢哋，好聽話，作為一個母親好感恩，佢哋會識得辨別是非，而佢哋對我嘅愛，亦能夠蓋過好多嘅唔開心，好似我攰瞓覺嘅時候，大仔會同細仔講，媽咪要休息，我哋唔好嘈媽咪；佢哋見到我唔出聲，又會擔心我唔開心，總之一切一切都成為我一個好好嘅動力。」
想寧靜過活
有指謝霆鋒做生意賺過億，栢芝對此表示：「唔好講話我兩個仔個老竇，其實邊個人好、邊個人唔好都唔關我事，我只希望針對住我、想令我唔開心嘅人，可唔可以好似電腦撳掣咁，將我Delete咗佢，大家唔係咁friend㗎咋，我都幾忙下，可唔可以當見我唔到呢！」
栢芝整個訪問過程，都是語氣平靜，她一再強調自己現在只想開開心心地過生活：「其實心靈富足畀金錢富有重要得多，我依家心入面嘅銀行係非常夠使㗎，哈哈！依家只想日日開開心心咁去過，唔想同心地唔好嘅人有任何接觸，寧靜咁過生活。」
|
鍾意就快D Share啦！
|
|
|
