洪永城離遠望到馬國明同唐詩詠傾得咁開心，即刻睥到實一實。
娛頭
後台直擊 肉緊唐詩詠 洪永城現真火驅趕馬明
正當馬國明密會黃心穎被斷正後，大家都以為馬明會放棄同洪永城爭唐詩詠，咁諗就大錯特錯。
星期一（ 13/3），馬明、唐詩詠、洪永城及黃心穎齊齊出席灣仔會展影視博覽活動，在台前四人都冇接觸冇交流，但本刊在後台就直擊到，馬明趁洪永城未到，借啲意同唐詩詠痴纏咬耳仔，點知俾洪永城發現後怒睥，洪永城更肉緊到忍唔住行埋去二人身邊驅趕馬明，搞到對方無癮行開，馬明惟有轉去搵後備愛人黃心穎頂檔慰藉。
死心不息
星期一（三月十三日），灣仔會展舉行影視博覽，大台晒冷派出大量藝員，當中包括三角戀緋聞男女馬國明、唐詩詠及洪永城，還有馬明新歡黃心穎都有份出席。
以為馬明有了黃心穎後，終於會放得低唐詩詠，退出這場爭女戰，但本刊在後台目擊到，當日馬明同唐詩詠較早到達，冥冥中安排兩人企埋喺附近，最初馬明就全程對住著了大露背的唐詩詠個肉背，同袁偉豪傾偈時都心不在焉。
但隔了一陣，馬明終於忍唔住愈行愈近，見到唐詩詠同監製王心慰傾偈，他借啲意插嘴撩傾偈，他們由最初幾個人傾，跟住慢慢愈傾就愈少人，最後得番他們二人，馬明更以《 On Call 36小時》「一件頭」醫生招牌式殺死女嘅眼神望住唐詩詠，而且傾到貼晒身哄得好埋咬耳仔。
離遠睥實
點知這個時候洪永城突然殺到，他遠距離睥到馬明實一實，表情仲相當肉緊，眼火爆的他完全無理過正在與他講嘢的杜如風，全神貫注𥄫住馬明同女友傾成點，隔了一陣見勢色唔對更忍唔住扮晒嘢帶杜如風去同女友打招呼，一行埋去兩個男人互當透明，完全冇打招呼零交流，而馬明就回頭睥了洪永城一眼，跟住無癮行開。
成功驅趕馬明，洪永城即時流露一副得戚樣，展示了一副勝利者的笑容，跟住就好似一塊貼身膏藥，全程做跟得男友，寸步不離以防馬明再有機會埋女友身，其間高層杜之克行埋去跟他們握手，似足去飲祝賀一對新人咁款，洪永城就十分受落，笑到烚熟狗頭咁，仲輕撫女友膊頭一下。
跟住洪永城再帶唐詩詠去老友黃翠如度，然後他自己要去做訪問，叫老友幫手𥄫住女友，等馬明唔可以再有機可乘。
洪永城用盡辦法阻馬明埋女友身，當然馬明就算面皮再厚，都唔敢喺這個場合再撩唐詩詠。
心穎送上門
於是馬明就轉移目標去搵後備愛人黃心穎，當見到馬明主動搵自己，黃心穎即刻好雀躍，報以一個姣笑，又學埋唐詩詠一樣同馬明咬耳仔，不過好明顯睇得出，馬明對住黃心穎同唐詩詠係明顯兩個樣。
「其實馬明見到詩詠對 Tony（洪永城）咁好，都知自己冇機，關係頂多都係維持契哥契妹，只可以葡萄，咁啱呢段時間心穎主動出擊送埋上門，男人嘅嘢就梗係食得唔好嘥，都嘗試吓同佢發展，但係馬明就好唔想公開關係，唔知係咪仲想留條後路俾自己，反而心穎就好想俾人知佢哋拍緊拖，宣示番主權。」馬國明身邊人說。
三角關係
自 14年，洪永城將唐詩詠私有化後，二人關係不時有暗湧，一時有契哥馬明和唐詩詠曖昧，一時有洪永城孖前女友夜蒲，謠言滿天飛。
翻撻舊愛
去年，洪永城被指背住女友唐詩詠翻撻形象指導舊愛 Bird Tse，洪永城為力證情未變，即於網上貼上一張與唐詩詠生活照闢謠。
互寸挑機
身為契哥的馬國明，一早話唔睇好唐詩詠戀情，揚言對洪永城要「睇定啲」，馬國明更多次向洪永城挑機，經常公開大讚唐詩詠係「好女仔」，更以「情侶檔」形容二人出活動，洪永城醋意大發，即火速反擊，大晒與唐詩詠甜蜜照。
念念不忘
圈中不少藝人，對於得唔到手嘅感情，甚至舊愛都念念不忘，關係糾纏不清。
林建名 何傲兒
14年，何傲兒與林建名爆出「爺孫戀」，女方極力否認，其後林建名現身書展，表示何傲兒不接電話，一度流淚，後來，女方再被拍到與周子揚甜蜜睇家品，上演「連啜 13啖」好戲，但林建名依然未死心，大開中門，簽約何傲兒加盟成為旗下大名娛樂歌手。
郭永淳 前妻伍智恒
07年，暗撻永安太子爺郭永淳，楊愛瑾一直被指是狐狸精，介入別人婚姻，前妻伍智恒因受失婚打擊，患上抑鬱厭食症，體重急跌至五十三磅，百病纏身，更不時更新微博，向 Miki控訴，飽受七年之痛。
撰文、攝影、攝錄：娛樂組
|
鍾意就快D Share啦！
|
|
|
