何寶貞（左）指兒子阿東（右）因兒時做過九次腦部手術，所以對穿白袍、戴口罩的牙醫非常恐懼，要他對牙醫張開口，要很有耐性。
新聞耳目
有口•難言
「我個仔做過九次手術，好驚醫護人員！係盈愛牙醫話，一定唔會放棄我哋……」
智障人士家長何寶貞（東媽）說着，黃豆般大的淚水徐徐落下。
淚水背後，東媽除受牙醫一言一行感動外，也許亦因這項無障牙科服務將告暫停。
事緣食物及衞生局於一三年撥款二千萬元，資助「盈愛•笑容服務」，提供為期四年的十八歲或以上智障人士牙科服務先導計劃。
計劃將於本年六月結束，現有一千八百人已完成治療，撥款僅剩六百餘萬元，但尚有一千五百人未完成服務；惟政府卻無意繼續「揼水」，甚至將關顧弱勢的責任踢給商界，建議盈愛申請關愛基金了事。
智障人士家庭這四年來短暫的歡喜，未來或要換上一場空。
上週五訪問，記者先問東媽是否同意患有嚴重智障的兒子出鏡，「唔緊要！最緊要你肯幫我哋！」智障人士家庭，彷彿注定面對一次又一次的求助無門。坐輪椅的兒子張鍚東，聽不懂母親與記者對話，更不知道或要向盈愛那群愛心爆棚的牙醫講再見，他只是側着頭看母親。
睇牙醫 如臨大敵
阿東出世時，因早產須在深切治療部留醫，卻不幸感染細菌導致腦膜炎兼有腦積水，變成嚴重智障患者；在三歲前先後接受過九次腦部手術，死過翻生。雖然他無法認知什麼是牙醫服務，但躺在椅子上，任由穿着白袍的牙醫，用工具在他口中撩東撩西，猶如兒時被推進手術室一樣，阿東畢竟有感覺，還是會恐懼。
「佢會好緊張，個人硬晒，對醫護人員好抗拒，你伸隻手埋嚟叫佢擘大口，佢就會推開。以前去學童牙科保健，有時牙醫唔太掌握智障人士，耐性差少少，已經做唔到，嗰日係白去一次……佢一瞓喺睇牙醫張櫈度，就如臨大敵。你冇得解釋俾佢聽、俾定心理準備佢，佢智力唔得。」東媽語調平和，大概習以為常。
自一三年阿東十八歲，就不能再享用保健服務。其實牙醫服務並非可有可無，由於智障人士欠缺自理能力，嚴重者更不懂表達牙痛牙患，真正有口難言，有苦自己知，「私家牙醫，你肯使錢人哋都唔肯同你做。唔少家長都試過，話搵嚟都冇用，你要嘥牙醫咁多時間，都撬唔開佢哋（智障人士）把口，梗係唔同你做。」東媽一直擔心兒子有牙患，於是每日勤力替兒子刷牙，笑言寧願刷到出血，也不願他患牙周病，「我哋班家長成日講笑咁話，佢哋淨係可以食、屙、瞓，如果啲牙壞咗，連食都食唔到，淨係屙同瞓，梗係發脾氣」
找回遺失已久的尊嚴
由香港牙醫學會、香港無障牙科學會及播道醫院，共同營辦的「盈愛•笑容服務」，是智障家庭的曙光，不過盈愛初期只開放予領取綜援的智障人士，阿東未能受惠，直至一五年才擴闊服務。阿東當時足足有兩年沒有完整洗過牙。
事實上，現時聖約翰救傷隊亦有義務牙醫，為殘疾人士提供免費牙科護理。不過聖約翰的診症時間短，一星期有五日、每日大概提供兩小時的牙科服務，且輪候人士多，阿東去過兩次，東媽認為服務與盈愛有分別，「佢唔可以有太多時間俾一個個案，好難同個智障人士建立到信任嘅感覺。」
來到盈愛，東媽沒想到兒子可以睇牙之餘，還找回在社區遺失已久的尊嚴。「你去邊度搵到啲人有咁嘅耐性，俾到時間你？我最記得佢第一次洗牙，洗到三隻，話要遲少少先洗得晒，個細路仔可能要食『瞓覺藥』（麻醉藥）先得。嘩，你都唔知，我感動到喊呀嗰日！」簡單的洗牙對智障家庭來說，奢侈非常，東媽鼻頭一酸，眼淚掉下。稍稍深呼吸，東媽續說︰「盈愛真係幫到我，佢哋同我講，你放心啦，我哋唔會放棄你哋。呢句說話聽到呢，個心噏到……好感動……」說着，東媽又拭淚。
牙醫眼中 一個都不能少
那次替阿東洗牙的，正正是無障牙科學會會長陳鄭玉卿。原來阿東曾中過風，右半身癱瘓；後腦有兩條植入喉管替腦部排走積水，東媽一直擔心兒子太緊張掙扎會引發抽筋，又怕太大力固定他的頭部，會壓壞植入喉管。阿東不受氹，又不饞嘴，唯獨陳鄭玉卿有辦法，「陳太好鬼溫柔，一路唔停咁同佢講嘢，啲語調細路仔識分，會感覺到你嘅身體語言友唔友善。陳太一直話，乖啦，好快，數三聲就得，一、二、三就停，真係拎番隻手出嚟。佢哋掌握到呢啲細路只有五秒忍得住。」
一五年四月至一六年八月，阿東去過四次盈愛，第一及第三次見牙醫，第二及第四次洗牙。在第二次洗牙時，阿東吞下麻醉藥水，牙醫終可完成不可能的任務，「嗰日食咗藥水都好啦，都令到另一個幫佢洗牙嘅李醫生好辛苦，真係好攰㗎，你又要留力，又要用力。前前後後洗咗成個鐘，中間又要俾個仔抖吓，坐返埋輪椅度，俾佢定吓神，嗽吓口。」
坊間的牙醫未必肯花多幾倍時間，照顧一個顧客的需要，然而在盈愛牙醫眼中，一個都不能少。記者上週四在盈愛待了一個下午，發現有些服務使用者比預約時間多等半小時至一小時，職員向他們解釋「唔好意思，之前嗰個用多咗時間」，家長們亦非常體諒。清潔大姐與記者閒聊時亦說︰「啲醫生有時都會開 OT，點都睇晒先走。」
受過恩惠，東媽不忘本，亦不忘為愛心牙醫發聲，「唔係要政府俾嚿錢你，叫你去搵私家醫生。我覺得政府係要將個服務常規化，有個機會俾我哋排吓隊（使用服務）。同埋啲牙醫幾年合約，對佢哋唔公道，我哋好似剝削緊佢哋。」
沒有放入施政報告的服務
無障牙科學會會長陳鄭玉卿向本刊稱，智障人士要找到合適牙醫相當困難，因他們害怕陌生地方，也需要家長陪同就診，部分人士更需要坐輪椅，故盈愛必須設在設有無障礙通道的地方，而且診治室要有足夠空間；亦有智障人士過去有負面牙科經驗，如自閉症人士會害怕修整牙齒的聲音，「要就住佢哋步伐一齊行，要有耐性，要做一次俾佢睇，但都唔代表佢會肯做，有啲係嚟好多次先有進步。」
當初政府二千萬元資助，陳鄭玉卿計過數，若以每人一萬二千五百元上限，可服務一千六百人，現時已「超額」完成，但原來需求比想像中多。不過當知道政府暫停撥款後，上月二十日已停收新症，「第三年完咗，我同食衞局講要求檢討，評估報告已經交晒。去到舊年十二月，已經遲咗幾個月，先可以坐低傾，但嗰次先知食衞局未預備金額延續。」
事實上，公營醫院亦有牙科服務供智障人士使用，不過陳太指輪候時間長達兩至三年；而社區有部分非牟利機構亦提供一般牙科服務，但沒有麻醉服務。「呢個計劃一直冇放喺施政報告或者財政預算案，如果政府可以承擔（智障人士）牙科服務，延續當初嘅心腸，會係好大幫助。」不過陳太至今仍未收到有關當局討論資助形式和金額的開會通知。
撰文：袁慧妍
攝影：梁譽東
news@nextdigital.com.hk
|
鍾意就快D Share啦！
|
|
|
