「如陽光~伴我~清新笑迎面」，一盒紙包飲品，喚醒塵封30年的集體回憶。近日網民積極搜索有關陽光檸檬茶歷代的廣告資料。當中網民對第一代以學生做題材的廣告特別感興趣。該廣告由鄭伊健和Yvonne Yuen做男女主角，主題曲由林慕德作曲、葉偉琪填詞，這首歌真箇耳熟能詳，但偏偏此歌的靈魂人物——原唱女歌手資料，多年來付之闕如，令網民搜索枯腸。不過，憑着去年年底林慕德一個電台訪問，再加上其他蛛絲馬跡，網民發現這把靚聲，原唱者好有可能叫楊楚營。《蘋果》昨日聯絡林慕德，他證實廣告中的神秘女聲便是楊楚營，但不幸的是，楊楚營唱完陽光檸檬茶廣告歌不久，就自殺身亡，死時只得約17、8歲。林慕德表示：「當年係我介紹楊楚營唱檸檬茶廣告歌，當時佢得15歲，但唱得真係好叻，勁到好似張惠妹咁，之後我簽咗佢。佢同李中浩合唱嘅《十萬個明天》，仲贏埋港台比賽，之後首《去吧》，0依家係陳慧嫻主唱，唔係話慧嫻唱得唔好，佢唱得非常之好，好多人都讚，遺憾係編曲唔及楊楚營咁好。咁當然，楊楚營真係唱得好。」對於當年有報道指楊楚營是自殺身亡，林慕德今時今日，仍然對其可信性有保留：「佢係孤兒嚟，7、8歲就唱歌搵錢，所以佢當時一個人可以住得起跑馬地成和道啲一房一廳單位，間屋有成600呎，報道話佢係開煤氣自殺，但唔make sense囉。喺我眼中，佢係唔會自殺嘅，因為佢當時就嚟出碟呀，唱得咁好…其實當時我想check吓佢死因，但周邊啲人叫我唔好理，呢一刻我都仲覺得好對佢唔住呀！」林慕德表示，在今年8月的個人作品展音樂會中，其中一個環節構思會向已故藝人致敬，當中包括羅文、陳百強，楊楚營亦會在名單之中。
| (資料圖片) | | |
| | |
|
鍾意就快D Share啦！
|
|
|
