分手要狠，Nuts哥真係要問吓方力申同鄧麗欣（Stephy），拍拖十年話分就分，咁放得低，唔係好多人做到㗎。兩個人好日唔見面，之前咁啱孖住見人，撞正分手一周年紀念，一樣交唔到戲，完全真情流露零交流，成365日都沖淡唔到，分手原因可想而知有幾僵。
一個男人勿近 一個逢女都啱
前晚輪到方力申單拖出席慈善活動，唔知係咪冇Stephy企喺隔籬眼超超，講嘢都零舍到位，佢話早排去山區探訪完，當地水都冇，水就好似鑽石咁，搞到佢返香港後浸浴變花灑沖涼五分鐘搞掂，仲話做人最緊要識知足。唔知係咪分手期已過，佢講嘢冇話就住就住，形容自己改變唔少，以前對工作有野心，家下就只求做好本分，就連擇偶條件亦唔同，話明要求高咗，以下係佢真情自白（絕對足本，未經剪輯）：「靚女一定要，樸素啲，因為我都係樸素嘅人，啱啱食完雞蛋仔，自己好鍾意食街邊地道小食，女朋友要容易開心、容易滿足同容易氹。」Stephy靚女就梗啦，但就係冇乜見過佢食街邊嘢，樸素應該唔會，因為成日撞見佢買衫。至於Stephy係咪好難開心、唔易滿足同難氹，未相處過唔敢講，唔通方力申趁一周年「紀念日」有感而爆，暗示鄧麗欣難服侍？
其實佢同Stephy本來係愛情神話，當飛魚王子遇上青春女神，怎料，經過一個暴風嘅晚上，完全被打落凡間試煉，「金童玉女」變為「癡男怨女」，兩個人一分手就好似攬炒，好似齊齊「撞邪」咁，Stephy突然「轉性」多咗個同性密友，十足男人勿近！反而方力申變身情場浪子，係女都啱，莫講話賭王千金，連女粉絲都唔放過，認真十年功力一朝喪，之前儲落嘅陽光正能量全部沽清。猶記得舊年佢哋一宣布分手，引發全城網民瘋狂式洗版討論，震撼程度好似原子彈喺MK引爆咁犀利，個個當正好似自己甚至阿爸阿媽離婚咁傷懷，依家搞到咁，好多粉絲應該好戥佢哋可惜。有人話佢哋當日身邊冇個和事老，先發展到目前呢個死局，咁如果有take two，解鈴還須繫鈴人，除了葉念琛不作他人想。
拍套「愛．回家」大團圓
點解又關人忍事？Playback番當年葉念琛當正Stephy係女神，特登開戲捧做女主角，諗住部《獨家試愛》係「獨家示愛」，點知令Stephy同方力申撻着，惟有「讓愛」焗住做好人，把心一橫再撮合佢哋拍《十分愛》、《我的最愛》，令佢哋愛得更深，直情等日結婚要封番封大嘅媒人利是畀葉念琛，點知好衰唔衰最終回嘅《紀念日》佢哋應景散咗，真的成也葉念琛，敗也葉念琛，所以有人提議葉念琛再組班開戲，睇吓可唔可以改寫結局，幫佢哋復合。不過，懂得愛情魔咒嘅葉念琛，今勻都知「kick手」唔知點寫落去，以往佢筆下嘅電影，男女主角都係離不開偷食同小三，今次要佢「改邪歸正」拍番套「愛．回家」嚟個大團圓結局，都咪話冇難度，唔怪得葉念琛都落晒閘話唔好搞佢！
|
鍾意就快D Share啦！
|
|
|