八卦陣
薯片落區玩電單車 鋪頭老闆係自己友
鬍鬚曾敗選，令香港人睇清中央真面目，呢場選戰亦繼續在城中熱議，唔少傳媒搵競選團隊成員做訪問，希望解構選戰部署。其中做過《蘋果》記者嘅盧勁業，喺《眾新聞》訪問中一句「記者感情太投入很危險」，聽聞行內唔少人都有意見。
選戰未能逆轉勝，薯片團隊可謂非戰之罪，反而鬍鬚曾多次大讚呢班幕後玩家，但人紅是非多，就好似盧勁業咁，佢現時除咗做 Photoblog總編輯，仲喺訪問自爆經營緊電單車鋪，《壹》仔就記得，上年十二月鬍鬚曾辭職之後，當時佢未獲北京批准請辭，就用空閒時間頻頻落區，其中一次就係去深水埗食腸粉，之後仲騎呢地走入一間「御峰電單車」鋪頭，再扮揸烈火戰車。
對於有幸獲薯片到訪，當日電單車行老闆三緘其口，但就好高調咁喺社交網站發相，仲加埋個「#如此親民無架子之人如果能當選特首應該幾好」做 hashtag，事隔數月，謎底終於解開，《壹》仔查冊發現，同「御峰」同一個鋪位做生意嘅「頭盔王」，唯一老闆原來就係盧勁業。咁餘下問題，究竟係鬍鬚曾到訪在先，之後才搵佢加入做競選團隊，定係因為係競選團隊成員，所以就因利乘便兼省招牌呢？不過可以肯定嘅係，自己人易話為，鬍鬚曾避開咗好多反對聲音囉！
拍檔逐個走 葉劉要頭痕？
連參選特首都要夢碎嘅葉劉，○八年強勢回歸當選立法會議員之後，一一年食住個勢組黨，當時如意算盤，係對外可以同泛民公民黨打對台，而在建制之內，就取代自由黨，但六年過去，隨着當日同佢「拍住上」嘅田北辰星期一宣布退黨，當年創黨班底，又少一個核心成員。
睇番新民黨當日成立係威係勢，創黨黨員有成二百六十六人，主要成員除咗有黨主席葉劉本人外，仲有當日同葉劉一左一右嘅田北辰同史泰祖醫生，但後者組黨無耐，已經成日傳佢同葉劉不咬弦，結果史醫生一四年以參選醫學會會長為由，決定跳船，不過佢都算有情有義，葉劉宣布選特首，佢係有現身表示支持。至於另一前副主席鄭承隆，喺一五年已經退黨，依家做咗新思維副主席。
新民黨一向定位，自己係做代表中產利益同公務員利益，同時走相對年輕路線，當年仲另外有兩個核心人物，一個叫陳岳鵬，被形容係葉劉「頭馬」，但佢原來只當葉劉係跑道，早就退黨加入政府做特首辦特別助理，之後仲扶搖直上，由政制及內地事務局政治助理做到現時係該局副局長。另一個核心人物就係屈奇安，佢就係消防處救護員會前總幹事，退休後搞政治，但一直上唔到位，後來索性退黨了事。
秀賢 BB熱定身 當選會捐一半人工
新東同九西補選雖然未定確實日期，不過唔少黨派都蠢蠢欲動，包括舊年敗選嘅新民主同盟范國威同埋工聯會鄧家彪，近月喺新東各區都見到佢哋插晒直幡宣傳。至於積極考慮出選嘅，原來仲有前學民、前學聯成員張秀賢。秀賢 BB近日同競選團隊正努力砌緊政綱，仲話諗住主打一啲過往民主派都好少涉獵嘅商界政策和經濟產業議題。
查實張秀賢學運同社運出身，講教育同政治議題似乎較着數，不過佢就話想喺非建制派之中開一條新路，希望多講論述同政綱，甚至參選時連口號都唔講。一直有傳佢同學民、學聯不和，佢就冇正面回應呢個問題，但強調有前學民、學聯成員都私下支持佢，只係因為「朋輩壓力」唔方便出面。
至於參選資金問題，佢就話不便透露邊個捐錢，只係重申有人願意捐助，「手頭唔係好緊」，強調所有捐款都係冇附帶條件。至於當選後，仲會捐出議員人工支持抗爭者，「一半走唔甩。」查實民主派已經有幾個基金支援抗爭者，張秀賢話人工唔係捐俾前輩設立咗嘅嗰啲基金，而係支援冇乜人理嘅抗爭者，唔通係講緊本土派？咁又會唔會捐番俾本土派組織呢？佢就話一定要有班人睇住筆錢，但就未諗到咁詳細同長遠。
居民遞完信抗議 天馬苑停車場即加價
黃大仙天馬苑停車場和商場等地方，上年六月被領展賣豬仔咁出售，接手嘅新業主同管理公司，結果「陰乾」屋苑令天馬苑變咗「遺城」，除咗出現恐怖鼠患，平台啲花草仲枯死晒，業主仲狂數新業主同管理公司多宗罪，搞到要喺呢個星期日舉行「救救天馬苑行動」為居民集會。
「救救天馬苑行動」當日喺屋苑集會兼遊行，最後去到管理公司喺商場個辦公室門口遞上請願信，結果被冷待只由一個管理員代收。其實由法團到幫手嘅立法會議員，都講過多次向管理公司接觸但不果，對方似乎當居民無到，而就喺居民抗議完第二日，管理公司仲突然出通告，貼出張「停車場加價」通知，以「物價成本上漲」為由，將停車場收費調高，時租由十五元加到十七元，廿四小時任泊，就由過去六十至九十元，大幅加至一百五十元；至於被變成浮動嘅月租車位，聽聞加幅都近一成。
啱啱至公開抗議管理不善，服務未見改善下，管理公司竟然大幅加價，難怪一班車主十分火滾，覺得管理公司擺明玩嘢，有心作對，甚至隨時可能有更激的行動。
撰文：巫不言
news@nextdigital.com.hk
|
鍾意就快D Share啦！
|
|
|