恭喜郭晶晶成功為霍家追 B，今個月生得！
娛頭
隱居半年 霍家傳統生三個 趕四十前達標 巨肚郭晶晶今個月生第 2胎
12年「跳水皇后」郭晶晶宣布上岸，嫁入霍家做少奶奶。唔夠一年，晶晶一索得男，為霍家誕下第四代嫡孫霍中曦（ Lawrence）。眨吓眼 B仔就快四歲，晶晶同霍啟剛終於再成功追 B喇！恭喜晒！
上週六（ 8日），晶晶同霍啟剛湊住囝囝，一家三口到數碼港出席生日 P。就快足月的晶晶，著住黑色鬆身衫，個肚籮咁大。臨盆在即，晶晶全程小心翼翼，大部分時間都坐定定，唔敢走動。
日夜趕工做人
入門後，晶晶一直以奶奶朱玲玲做目標，要生夠三個先「收工」。今年 35歲的晶晶，免得做高齡產婦，惟有快馬加鞭，同時間競賽。除咗積極補身，兩公婆更經常孖住行山操弗副偈。去年終於得償所願，第二胎，得咗！
「晶晶希望四十歲前完成目標，生夠三個收工。同埋佢兩公婆都想追番個女，加上 Lawrence四歲大，都係時候生多個陪佢，晶晶係運動員，本身個底子好好，稍為調理吓，話咁易就得咗。」知情者透露。
巨肚隨時生
上週六（八日），晶晶一家三口到數碼港艾美酒店的一間西餐廳，參加生日 P。隨時生得的晶晶明顯發福，手腳都出現水腫。著住黑色鬆身衫褲，個肚籮咁大。
佗住霍家骨肉，晶晶小心至上，全程保持慢動作，大部分時間坐定定，唔敢四圍走，湊仔重任交俾老公同工人姐姐。遺傳媽咪運動 DNA， Lawrence冇時停，三歲人仔已學識踩單車，仲鬼咁大膽踩得勁快，追到工人姐姐索晒氣。
狂食生冷嘢
阿仔放電，晶晶就坐埋一邊同其他家長吹水。就快生得，晶晶唔使戒口，見她大啖大啖食西瓜、又狂啜薄荷冰，勁好胃口。一向廿四孝的霍啟剛全日不停分身，陪完囝囝玩，轉頭又陪老婆。
阿仔玩到身水身汗，俾爸爸捉返餐廳，點知 Lawrence坐唔定，趁爸爸擰轉面，仲捐入枱底玩，晶晶冇咁好氣，相反霍啟剛就捉住囝囝訓話， Lawrence當堂爆喊，見阿仔喊得咁淒涼，霍啟剛心軟抱起囝囝，之後仲狂錫面珠呵番。
坐足兩粒鐘，晶晶終於起身走動，舒展筋骨。不過唔夠五分鐘，晶晶又見攰，要雙手叉腰抖抖。 Party到尾聲，例牌有影大合照環節，一向低調的霍生霍太，為免大肚相流出，只派囝囝同工人姐姐埋位影相。玩足一個下晝，阿仔冇晒電，扭計要爸爸「騎膊馬」，一家三口先行撤退，行去停車場攞車返歸。
順產生 B
預產期今個月的晶晶，雖然已有上一胎經驗，但今次一樣嚴陣以侍，一早做好準備，迎接 BB出世。據知霍啟剛已經 book定養和豪華套房，重金禮聘五人陪月團，到時霍啟剛更會陪晶晶入產房，親手幫 BB剪臍帶。
「同上次一樣晶晶唔想捱一刀，今次都係會揀順產，同埋順產復元得快啲，佢哋兩公婆已經 plan定，一坐完月六月中就會飛去倫敦旅行，過吓二人世界。」知情者說。
生得多分得多
霍英東○六年去世後，留低 300億遺產，並立下遺囑以「共產方式」分配。當中包括家族成員共住的沙宣道大宅，甚至名車，全部「阿公」持有，家人每月將獲派一定數量「零用錢」。
據了解，晶晶同霍啟剛原本每月獲「阿公」分派十幾萬「零用錢」，一三年晶晶誕下大仔 Lawrence後，「阿公」即刻開水喉，每月發放多六萬元生活費，一家三口更獲分派價值六千萬的四層排屋，可以搬開自住。換言之，今次晶晶再度有喜，每月又可從家族基金中攞多六萬蚊生活費。
「大家族點都係生得多着數，同埋啟剛話晒係長孫，生第一胎嗰陣，家族基金都撥咗筆錢俾佢哋做 BB教育基金，今次第二胎都唔會少。」
西瓜清胎毒
大肚婆禁忌多，要小心注意飲食，戒生冷煎炸食物及凍飲，忌著高踭鞋；但坊間傳言，一般懷孕七至八個月，進入倒數期間，在胎兒穩定情況下，孕婦可以吃適量西瓜，有助容易生 B及清胎毒，減低濕疹症狀。根據家庭醫生關嘉美表示，一般冷凍食物，容易沾染細菌，有機會令孕婦腹瀉腸胃炎，而導致脫水，令胎兒受損害。
至少生三個
坐擁三百億身家的霍英東，家族龐大，每代入門新抱為霍家傳宗接代，誕下金笸籮都重重有賞，生 B獎金當然唔少得，幾乎個個都以朱玲玲為目標，至少生三個先收工。
霍震霆 朱玲玲
78年，與霍英東長子霍震霆閃婚，朱玲玲於三十歲已先後為霍家誕下三名男孫，霍啟剛、霍啟山及霍啟人，為專心照顧三名兒子，朱玲玲全面退出娛樂圈及社交界，其後，有傳夫婦二人關係亮起紅燈，朱玲玲更搬離霍家大宅； 04年，二人離婚收場。
撰文：娛樂組
攝影、攝錄：蕭敬漁、瀚鍾
|
鍾意就快D Share啦！
|
|
|