首次見樣
李嘉誠落 order要見孫，早前 Isabella帶住三個仔秘密返港。
娛頭
阿爺下旨一年要見孫兩次 梁洛施帶三子秘密返港
09年，年僅二十歲的梁洛施（ Isabella）為李澤楷誕下骨肉轟動全城，翌年再接再厲，成功誕下一對孖仔，可惜關係維持了四年便玩完，童話落幕，從此 Isabella湊住三子隱居多倫多。
Isabella與三子的行蹤向來都極之神秘，除了長治剛出世時，李澤楷曾發相外，三個小朋友都未見過真身，但原來上月中 Isabella帶了三個囝囝返港，眨吓眼七歲大的李長治，同老豆餅印一樣，簡直係「 Mini版小小超」，絕對唔驚走失！至於從未曝光的孖仔 H&N，兩兄弟無論高度、樣貌都好似倒模咁，好得意！據知今次 Isabella接旨返港，主要任務是要帶三個仔同爺爺李嘉誠聚天倫。
阿爺下旨見孫
去年李澤楷被拍得同新寵郭嘉文密遊日本，最近女方仲一炮過買入過億逸瓏天池屋，雖然「楷女郎」一個接一個，但手持三張王牌的 Isabella，仍然得到小小超無限量照顧。
一直長居多倫多的她，獨力湊住三子，小小超雖然公事繁忙，但定時定候都會飛到當地一家團聚。據知爺爺李嘉誠因為掛孫心切，下旨每年最少要見三粒孫仔兩次，所以每隔半年， Isabella就會帶埋三個仔返港見爺爺。
「之前有傳聞話孖仔唔得爺爺歡心其實唔係，爺爺都有想過接三個孫仔返香港住，不過 Richard唔想，佢想啲小朋友喺多倫多生活，唔想佢哋俾傳媒騷擾，所以佢哋每次返嚟都好低調，唔會揀大時大節假期日子。」知情者透露。
特事特辦
早前 Isabella在媽咪陪同下，秘密帶三子返港，湊住三個未來李氏集團的「繼承者」， Isabella行事十分小心。返港期間，有目擊者見過 Isabella同三個仔低調現身數碼港，留港十日，一行人馬上折返多倫多。
為掩人耳目，回程當日 Isabella刻意同媽咪分開到達機場，大仔長治交由媽咪照顧，自己則負責湊住一對孖仔。到達機場，先派兩名保鏢代辦登機手續，之後 Isabella一手拉喼，一手拖住囝囝，在航空公司職員協助下「特事特辦」，急急腳從職員通道入閘。
衣著平實
出世至今，李家上下對三個千億孫仔一直採取高度保護，眨吓眼已經六歲的孖仔今次首度見樣，當日兩兄弟著住一藍一白的間條衞衣襯牛仔褲，戴 cap帽、孭背囊，全身都並非名貴嘢，貫徹李嘉誠「千億孫仔」低調打扮。
驟眼睇孖仔一樣高度，而且超似樣，十足十倒模一樣，非常得意！至於剪了一頭短髮的 Isabella，一身 casual wear，孭住約一千元的 Longchamp帆布袋，打扮非常樸實。
「 Bella湊仔方法跟足李家一貫作風，好樸素。佢唔會買好貴嘅名牌俾啲仔著，都唔會亂買玩具，平時喺多倫多，佢哋都係去啲平民餐廳，出入都冇保鏢跟身，好低調。」知情者透露。
孖仔乖巧
入閘後， Isabella湊住孖仔先去會合媽咪同長治。現場所見，一對孖仔非常乖巧，沿路一直拖實媽咪。搭無人駕駛時，孖仔大聲說話， Isabella示意要降低音量，孖仔立即聽話收聲，之後三母子走入 lounge會合長治，齊齊等上機。
直至航班起飛前十分鐘， Isabella同媽咪湊住三個仔，施施然步出 lounge，今年七歲的長治終於現真身，身穿曼聯運動衫的他已經高到媽咪心囗位置，無論神情同樣子都似足老豆，加埋棚牙完全餅印一樣。沿路 Isabella拖到長治實一實，其間長治想除低帽， Isabella即刻阻止。
長治自備樂器冧爺爺
Isabella曾經透露長治好有音樂天分，細細個開始學鋼琴。今次返港，為氹爺爺開心，長治更自備樂器表演。
「三兄弟性格好唔同，長治比較文靜鍾意音樂，唔止學琴，最近仲開始學 trumpet（小號），今次仲特登帶埋支 trumpet返嚟吹俾爺爺聽，孖仔就好動啲，鍾意踢波打羽毛球。」
兩次復出撻 Q
卸任「楷女郎」後， Isabella難抵寂寞，一直希望搵機會復出。一三年， Isabella在台灣接拍文藝片《念念》，可惜票房同囗碑一樣麻麻。翌年 Isabella再試水溫，同恩師詹瑞文合演舞台劇《快樂勿語》，九場門票冇場爆，入座率僅得七成，兩次復出撻 Q， Isabella索性疊埋心水專心湊仔。
李氏繼承人
作為香港首富之一的李嘉誠，身家多到幾代都使唔晒，現階段李澤鉅同李澤楷繼承老豆生意，去到李氏第三代，亦不乏後人，但暫時個個都仲細。
李澤鉅 王儷橋
93年，與王儷橋結婚，婚後二人共育有三女一子。 21歲大女李燕寧，亭亭玉立；二女李思穎和細女李燕容，仲讀緊中學；三女甚少公開露面。至於金笸籮李長禧，現年十一歲，作為李家長子嫡孫，分外保護，返學放學都有保鏢跟實，生活亦要保持低調，著平民衫，戴幾百蚊平價手錶。
李澤楷 梁洛施
與女友梁洛施育有三子，長子李長治現年 7歲，而另外兩個孖仔細佬只有 6歲，三個小朋友先剛開始讀書，未有咁快做到接班人。
甚少露面
一直好保護三名兒子，偶然只會從社交網貼上三子背影，或是被網民捕捉行蹤，從未正式公開露面。
美國麥當勞
11年，網民爆料梁洛施驚現美國鳳凰城麥當勞，與長治歎平民餐賀兒子生日。
撰文、攝影、攝錄：娛樂組
|
鍾意就快D Share啦！
|
|
|