呢嚿枯木在他手上變成藝術品，雕琢數年，至今仍未完成。
探熱針
《天師執位》大粒癦廖駿雄 消失幕前廿年 由收買佬變環保木匠
84年大台經典劇《天師執位》，除有令人回味的苗僑偉與翁美玲的演出，肥頭耷意的配角「大粒癦」一樣令觀眾難忘。
原來在幕前消失近廿年的「大粒癦」， 97年離開大台後，做收賣佬發達，亦經歷過生意失敗債台高築，今日他成為環保木匠，擅把枯木活化的他，亦把 58歲的自己重新包裝做型佬，再戰娛圈。
離開大台即失業
九七年拍罷《鹿鼎記》，「大粒癦」廖駿雄決跟大台 say goodbye。豈料外闖第一步遇上金融風暴，頓即失業。廖駿雄說：「當時公司（ TVB）猛叫我續約，我求佢唔好再簽我，因為已經鋪晒路去馬來西亞發展，點知一個金融風暴，嗰邊好多戲都唔再開，我當堂企咗喺度，又唔返得轉頭，無理由認低威。」
開夜冷到欠巨債
市道蕭條失前途，他腦筋急轉，食住逆市化危為機。「我決定喺九龍城開鋪做夜冷，因為當時好多公司執笠、破產，好多跳樓貨接收，試過有間日本煙草公司撤出香港，我喺高級職員同老細間辦公室執到好多筍嘢，包金嘅杯，好多好嘢，執到十萬八萬貨，開業第一個月，我做咗廿萬生意。」九九年生意擴充，租埋何文田四千呎鋪位。「呢度係我仆街嘅時候。」回頭看，廖駿雄像說笑話。「一來擴充太快，二來金融風暴過渡期完咗，啲人回番氣，唔係咁多貨收。生意開始走下坡，我唔甘心仲搏落去，結果由賺變蝕，欠下百萬債。」
落難避見圈中人
落難時，他拒跟圈中朋友聯絡。「當時啲圈中朋友唔知我落難，因為人要面樹要皮，費時同人講。避開唔聯絡，亦因盡量唔想使錢，當時每日老婆俾廿蚊我用，早餐都唔敢食。我寧願人家俾條路我行，都唔想借人錢。我係輸晒冇路行，我只需要一條路，肯做就搵到食。」最後他投靠家姐，幫手打理 trading生意，之後他北上自立門戶。
他說：「單拖上去浙江開山劈石，一踎就八年，還晒啲債，仔女又大晒我就喺○四年結束生意返香港，因為呢盤生意唔係我想做嘅嘢。」
環保木匠兼演員
贏過、輸掉再翻身，廖駿雄回流過住半退休生活，把做夜冷時學懂將甩皮甩骨的舊物翻新，鑽研成一門木藝，專把枯木活化成藝術。「你睇係爛木，我眼中係藝術品，每嚿爛木頭其實都有生命，我要令佢有二次生命。」
去年他重出江湖拍戲，網劇、電影一部接一部。「我啲 friend大多都係圈中人，見番佢哋我好開心。」將自己活化，就是做自己喜歡的事。
翁美玲尋死前 廖駿雄：如果堅持留低陪佢……
在《天師執位》，翁美玲既是廖駿雄的演出拍檔，也是他老友兼訓練班同學湯鎮業的女友，故二人私交甚篤。 85年 5月，翁美玲自殺當晚前幾小時，廖駿雄在公司錄影廠碰見悶悶不樂的翁美玲。「見佢好唔開心，我問阿翁：『使唔使我留低陪吓你？』佢話唔使。點知我拍完夜班開早時，就聽到佢出事，當刻我後悔，會諗如果當時我堅持留低陪佢，可能會好啲。」可惜如果沒如果。「個心因此唔舒服，不過之後諗通咗，人生根本好多嘢整定。」廖駿雄說。
佢係村長個仔
廖駿雄的父親廖潤琛是上水圍村村長，但作為村長個仔，他並非二世祖唔使憂。「我爸爸係一個專注為地方做嘢嘅村長，將搵到嘅錢都放晒落公益同藝術度，深受村民愛戴，佢兩袖清風，所以我冇父蔭，一直靠自己。」
五十年代上水石湖墟兩度經歷大火，九成家園被燒毀。廖駿雄說：「我爸爸同張人龍四處奔跑籌錢重建上水石湖墟，爸爸亦因此受到尊重，之後政府喺上水一條路命名『龍琛路』，紀念佢哋功勞，上水有間學校亦以爸爸命名。」
撰文、攝影、攝錄：娛樂組
|
鍾意就快D Share啦！
|
|
|
