校長推出新碟，獲3女星撐場，異性緣真係好！
校長譚詠麟下午現身北京，為全新國語專輯《欣賞》今日隆重推出而舉行記者會，獲三位女歌手李幸倪（Gin Lee）、丁噹及陳潔儀以嘉賓身份到場祝賀，未能到場嘅陳奕迅、張學友、五月天等都有拍片送上祝賀。環球亞洲地區高層都有現身支持，並送上紅色旗幟賀校長，寓意他征戰樂壇多年，創造出更好成績。
另外，丁噹喺台上話同校長錄音嘅時候，校長同自己分享咗好多男女之間，當感情去到一段長時間，唔知道應該繼續定係分開嘅時候應該點做，即令到全場大笑，她即解釋校長係以過來人嘅身份同自己分享過往嘅經歷。
新碟籌劃三年
接受訪問時，提到今次重本投資，校長透露專輯製作費係unlimited，連去錄音室都超過一百次，因為非常重視專輯，所以由籌備、邀請歌手合作、監製、作曲及填詞部分都有份落手落腳參與，校長話：「做得到係我嘅福氣，久唔久都要提升吓個領域！」今次的新專輯執行兩年、籌劃三年，製作及宣傳費用，校長直言所有歌手及工作人員的機票兼酒店食宿都由環球負責，只係計製作費都花咗150多萬，還有校長最寶貴嘅誠意，不過呢啲費用全部都未計自己嘅酬勞，笑言夾夾埋埋都使咗幾層樓嘅價錢。
問到點解淨係邀請三位女歌手到記者會，校長搞笑指因為所有合作的男歌手，包括孫楠、陳奕迅、張學友、五月天等，都正在巡唱及有工作在身，所以嚟唔到。問到會唔會開演唱會，校長坦言話唔敢諗，因為宣傳已經很有難度，而所有歌手都有工作在身，好難夾檔期，除非大時大節：「大家都明嘅，實現到夢想已經好開心，已經好富有㗎喇，心中富有！」
至於接下來的宣傳計劃，校長指稍後會繼續到上海、台灣、新加坡及馬來西亞，亦會宣傳個人演唱會，而Gin Lee就會擔任演唱會嘉賓。
來源 source: http://hk.on.cc
|
鍾意就快D Share啦！
|
|
|
