熱爆娛樂: 貼地富二代　劉鳴煒食平啲　超雲去街市買餸 [壹週刊

2017年4月27日星期四

貼地富二代　劉鳴煒食平啲　超雲去街市買餸 [壹週刊 - 1416] __,鳴煒,富二代,超雲,劉鳴煒,M1,

名人動態

貼地富二代　劉鳴煒食平啲　超雲去街市買餸

富二代俾人的感覺就係二世祖，乜都唔使自己落手落腳做，下下都可以點人做，衣食住行樣樣都係最貴最頂級，如果咁諗的話就大錯特錯，好似大劉（劉鑾雄）個大仔劉鳴煒，同賭王何鴻燊兩個千金超雲及超盈，其實他們都有好貼地平民的一面。

沙律當午餐

大劉分身家後，大仔劉鳴煒揸住華置近 25%股權，身家達 300億，不過他偏偏與老豆相反，一點都不浮誇，生活過得相當平民化，出入唔會有保鏢跟身，衣著打扮從來唔崇尚名牌，手上長期都只係戴住價值幾百蚊 Casio電子膠錶，就連 08年他的前妻 Wendy生龍鳳胎，他都安排在公立醫院分娩。

日前劉鳴煒現身中環置地廣場，當時正值 lunch時間，他一支公去到 PRET A MANGER買外賣，以為他會好似一般白領，買件三文治再加杯咖啡當一餐，點知他一入到店內就好熟架步，去凍櫃攞了一杯香橙西柚沙律，盛惠廿五蚊。

一個普通 OL食咁少都唔夠飽，何況劉鳴煒堂堂一個大男人，斷估他唔會為減肥啩，又或者他想親身示範俾年輕人睇，除了去少幾次日本，睇少幾場戲之外，就連食嘢都要食平啲，這樣先會儲到買樓首期啩！

自從大劉分身家後，劉鳴煒身家有成 300億，但他出入都唔會有保鏢跟身。

劉鳴煒是該店熟客，一入到店內他就去雪櫃攞咗杯價值 25元沙律。

其實劉鳴煒可以搵秘書幫手買外賣，但他親力親為。

劉鳴煒連公事包都用個印有「 CIS」布製袋。

大劉與甘比出入都有幾個保鏢護住。（《蘋果日報》圖片）

去台灣公幹，劉鳴煒都只係搭捷運。

劉鳴煒同前妻所生的龍鳳胎，都是在公立醫院出世。

劉鳴煒手上隻 Casio膠錶戴了好幾年，十分慳家。

格價超雲遊街市

賭王三房長女何超雲，平時喺名店就見得佢多，但原來千金小姐都有貼地一面，超雲一身街坊裝喺灣仔街市買餸，街市人來人往地下又濕漉漉，超雲唔嫌污糟之餘，更懶理途人眼望望，她專攻菜檔，行完一檔又一檔，格完一輪價後，超雲終於鎖定目標，買了粟米、紅蘿蔔同菜，而菜檔老闆見何家千金大駕光臨，笑到四萬咁口。

買咗一大袋餸，超雲遞俾身邊友人，自己就兩手 fing fing行去上車，見到《壹》仔，超雲仲笑笑囗話：「今日幫阿媽買啲嘢！」孝順女，抵讚！

超雲去到街市，發揮師奶本色，落力講價。

積極減肥的超雲專攻菜檔，買齊粟米、紅蘿蔔及大量蔬菜。

超雲呢身運動街坊 look，好罕見！

超盈掃平價衫

超雲「哎吔姊妹」何超盈被阿媽四太梁安琪鞭策，近年積極學做生意，創立「超盈文化有限公司」同「保利澳門拍賣有限公司」做 CEO，投入藝術工作，戴住「賭王千金」光環， 26歲的超盈話咁快就喺商界有成績，仲入選埋《福布斯》最矚目亞洲女強人之一，真巴閉！

前排《壹》仔撞到女強人去入貨裝身，唔好以為呢位何家千金淨係著名牌，唔貴唔買喎，睇吓佢孖住個 friend行平民時裝店 Zara，一樣滿載而歸，就知佢有幾慳家。

當日下晝，超盈眼腫面腫似係啱啱瞓醒，出現喺名店林立嘅 IFC，不過佢就似乎對 Zara情有獨鍾，入到店鋪睇吓價錢牌，全部幾百蚊有交易，超盈在女裝部左揀又揀，仲好雀躍咁不停將衫拼上身，搜索一輪，超盈左手拎住對鞋，右手又拎住件衫，揀啱心水，超盈試都唔使試，就拎去俾錢。