新一代咪神的朱智賢（Ashley）今日突然喺ig爆Seed，話俾自己阿哥打，仲講到家門不幸，認真慘豬。之前Ashley就喺森美同小儀主持嘅《千奇百趣特工隊》，同馮盈盈一齊做「特務」，見佢喺節目入面都好活潑開朗，點知今日下晝佢就突然喺ig到貼圖同留言，言詞間發覺佢係被家暴喎！佢話：「有個咁嘅阿哥真係家門不幸，由細到大成日俾佢打，拳拳到肉，細個咩都唔識，剩係識喊，到大個咗，睇住佢問候阿媽祖宗18代，不知幾想鬧返佢轉頭，不過唔想多管閒事，啲人成日話父母有責任 我覺得佢已經35歲人係成年人，已為人父都唔識做人真係好悲哀！」Ashley仲話：「好多時我忍讓係因為唔想爸爸難過，但唔代表我會忍一世，最後我想講，我真係好傷心有個咁嘅阿哥！」最後佢仲PS留言:「喺度希望天下嘅兄弟姊妹相親相愛互相尊重」。朱智賢疑似家暴回應傳媒：「我依家冇咩，唔方便講咁多。」係咪屋企出現咗問題？「最近有問題。」同哥哥係咪有問題？「我同佢無聯絡，我依家唔係屋企住。」咁係咪離家出走？「我啱啱去咗朋友屋企住。唔想同佢有正面衝突，唔想諗咁多。」咁你有冇受傷？「我依家ok。」係咪由細到大同哥哥關係好差？「係，我都唔知點解咁，依家爹哋會處理。依家心情唔咁好，唔好意思，唔想再講。」有網民見到「咪神」咁慘豬，就留言安慰，有網民話：「好人有好報，惡人有惡报，呢d欺善怕惡遲早天收佢...加油朱朱，没事㗎！有需要就報警處理，唔需忍，越忍佢就越得戚」；「最好先開家庭會議，聽下父母和各家庭成員意見再決定如何處理。個人愚見：暴力是不能解決問題，唯有愛與關懷才能解決問題。祝順利」有網民話要報警，但亦有網民持相反意見話：「唔可以報警！本是同根生，相煎何太急？」
|
鍾意就快D Share啦！
|
|
|