戴住口罩的苟芸慧早前拖實男友陸漢洋到數碼港拍拖睇戲。
探熱針
陸漢洋錫到出晒面 苟芸慧 ready做人妻
苟芸慧成功減磅，還原靚靚重奪「苟索」之名，同錫礦大王陸佑後人兼賽車手陸漢洋（前名陸恭和）拍拖大半年，愛得愈來愈痴纏，而且好事近，苟芸慧最近高調表示隨時 ready做人妻！上星期，一對小情人趁住假期即爭取時間到數碼港睇戲，實行摸黑拍拖，散場時，陸漢洋見周圍無人即放下戒心捉實女友而行，最後仲做埋柴可夫車苟姑娘齊齊返歸過夜。
摸黑拍拖
苟芸慧去年八月傳出跟錫礦大王陸佑後人陸漢洋撻着，但為保護戀情，她一直拒絕認愛，直到今年初，二人感情穩定，兼且已經見晒家長，苟姑娘為箍實有米男友，終於大方承認戀情。當晚約八時，戴上口罩的苟姑娘以一身休閒服裝上陣，由男友揸車接載到數碼港戲院睇戲，同樣熱愛賽車的二人當日選擇欣賞電影《狂野時速 8》，散場時，二人刻意去到人流較少的商場出口離開，其間陸漢洋有講不完的話題同女友傾偈，兩人仲傾到指手畫腳，似是研究剛才的劇情，行到大街時，已戒煙的陸漢洋改為吸食電子過吓口癮，由於附近冇閒雜人關係，他們終於放下戒心愈行愈近，見女友準備過馬路時，陸漢洋為免有車突然駛過，即緊張地捉實行在前方的女友，之後他仲揸架 Tesla做埋柴可夫車苟姑娘齊齊返歸過夜，難怪苟姑娘經常公開讚男友細心又識照顧人。
見晒家長
苟芸慧去年多次被拍到同陸漢洋密會，因而被指做小三介入陸漢洋與無綫前主播張頌恩戀情，其後陸漢洋立即維護苟姑娘，指早年已跟張頌恩分手，事後，苟姑娘一直拒認戀情，稱對方是「賽車認識的朋友」，但是不認不認還須認，去年十月陸漢洋四十三歲生日，苟姑娘以女主人姿態出席男友生日 party，最近二人感情穩定，苟姑娘終於承認戀情，出席活動時，仲表明有待嫁的心，已 ready嫁人，更表示爸爸對男友印象不錯，讚他細心又負責任，覺得他是可付託終身的對象。
照顧周到
「苟姑娘因為賽車認識到賽車手陸漢洋，好快就已經 feel到陸漢洋對苟姑娘特別照顧，其實嗰陣同一時間都有幾個人追佢，不過陸生同苟姑娘有共同話題自然着數啲㗎啦，佢哋真係好啱傾，苟姑娘有病嗰陣陸漢洋成日陪住佢開解佢，又主動教苟姑娘好多賽車嘅秘技，之前茍姑娘喺珠海參加賽車明星賽遇到意外，嗰陣陸漢洋不知幾擔心，嗰件事冇耐我哋都已經 feel到佢哋一齊，不過苟姑娘死口唔認咋嘛，佢話拍拖始終都想認定係結婚對象先開始，所以而家佢認為應該好事近㗎喇！」知情人士透露。
而之前曾經同不少女星傳過緋聞的陸漢洋，今次對苟姑娘亦特別認真，除了安排靚車及司機管接管送外，又將貝沙灣單位俾她居住，去年苟姑娘約滿大台，知道她做得唔開心，於是又開公司請人幫女友接 job，處處為她設想。
鑽石級筍盤
現年 43歲的陸漢洋家底豐厚，他熱愛賽車，去年參加法國勒芒 2016短途賽事，獲得第十九名，陸漢洋為錫礦大王陸佑後人，父親是公和建築創辦人陸孝佩，而母親則是聖安娜餅店創辦人；自小移民加拿大，於美國波士頓東北大學取得金融及市場學雙學位，其後回流香港，現時為十多間上市公司董事主席，公司生意涉及零售、公關、進出口及金融投資等；與圈中不少女星分屬好友，曾與官恩娜、應采兒和韓君婷等傳緋聞，屬城中鑽石級筍盤。
撰文：娛樂組
攝影、攝錄：陳亦龍、李溢敏
|
鍾意就快D Share啦！
|
|
|
