娛樂偵訊
聽話有得撈 一個月減 10磅肉 36歲甄詠珊入大台做張穎康阿媽
前女子組合 Freeze成員甄詠珊 10年離隊轉投亞視，更拆彈由 D cup變 B cup，之後傳出婚訊，不過臨門撻 Q，復出娛圈的她，去年底簽無綫由新人做起。為爭取機會，甄詠珊聽話先減十磅肉，瘦完身，再做埋細她一年的張穎康後母，好使好用。
珍姐下令唔好肥落去
初到無綫報到的甄詠珊，未拍完《誇世代》，即有機會入組新劇《燦爛的外母》，劇中同六十七歲的威利一對，更榮升阿媽級，做埋細她一年張穎康後母。電視劇開鏡，一家三口更齊齊影合照。
「阿珊好聽話，佢入無綫第一部劇拍《誇世代》，開鏡嗰日見到珍姐，俾珍姐話咗一句唔好再肥落去，自動自覺即刻減肥。佢開始只係戒食油鹽同食烚雞肉，不過唔多見效，要加埋運動，一個月減咗十幾磅，之前一百一十磅，依家唔夠一百磅。」身邊人透露。
李佳芯令她自卑
甄詠珊自言入無綫後，見到大部分女藝人都係「紙板人」，尤其遇到跟她第一次合作的李佳芯，「佢話企喺李佳芯隔籬就好自卑，因為佢好瘦，阿珊手臂做得佢兩隻，不過咁樣上鏡先叫啱啱好。」知情者說。
唔想在一班奀妹前變大山婆，其後加碼每日做夠粒半鐘運動減肥肉，三十六歲的她，更加唔介意做阿媽角色。
「無綫啲中女姐仔賣少見少，就算好似佢咁三十幾歲嘅年紀都唔多，加上阿珊抵得諗，好似新劇做威利哥女友，之後做埋張穎康阿媽，佢都冇 say no。大台啲女仔好多都驚做阿媽，有啲場口仲要化淡妝，阿珊份人易話為，所以入去唔夠半年就接咗兩部劇。」知情者說。
對於跟甄詠珊在劇中做情侶，威利唔覺二人外形相差一大截，他說：「都唔係嘅。做戲磨合吓，溝通吓。」問他有否察覺甄詠珊減了十多磅，他十分贊同：「要做嘅，呢個係演員本錢之一，工作之一嚟。」
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|