熱爆娛樂: 鋤 D會發揚光大 [壹週刊 - 1422

2017年6月8日星期四

鋤 D會發揚光大 [壹週刊 - 1422 - 財經] __,M1,

昔日鋤 D會的三大台柱，（左起）大劉、許家印及鄭裕彤，不單透過鋤 D維繫班 D腳，亦透過炒股齊齊上，金融海嘯後恒大債台高築，彤叔曾出手相助，股價後來彈升亦賺個盆滿鉢滿。

中環人語

鋤 D會發揚光大

彤叔上咗天堂，純官又休養緊，咁有乜可以箍住班 D腳呢？睇吓恒大（ 3333）一個月之間，股價升咗一倍就知。

兩年半前，許家印間恒大撲水籌旗十五億美金（約 117億港元），於是發一隻叫「永久可換股證券」—— Perpetual Convertible Bond，息口有七釐，不過只限「鋤 D會」成員認購，如純官的新世界及周大福，張松橋的中渝置地（ 1224）及中策（ 235）等，恒大股價大升，鋤 D會成員財息兼收，呢批 Perpetual Convertible Bond嘅換股價$8.06，恒大股價升至十五、六元，單計新世界系股價，賬面已賺近一百二十八億元，再加埋兩年間收二十億元利息，總共袋近一百五十億元，彤叔泉下有知都笑到騎騎聲，接班人能夠將鋤 D會發揚光大，呢啲就叫做自己友閂埋門打麻雀抽水食大茶飯

純官中風後雖休養生息，但恒大股價近排急升，令老父交低嘅鋤 D會發揚光大。

鋤 D腳之一張松橋（右三）及林孝文（左一），於彤叔出殯當日陪同「上山」。

又一個高尚情操

白頭任雖年近七十，保養得宜經常運動裝上陣，優哉游哉同老婆繑住手行 City'super，但盛傳即將加入行會嘅佢唔單只又要孭番件老西見人，就連瑞銀非執董呢份酬金年過四百四十多萬港元的優差亦要放棄，做個行會成員，年薪九十萬左右，正如董伯伯所說，願意放棄年薪數百萬來回饋社會，又一個高尚情操。

白頭任退休生活，會同老婆仔去 City'super買餸，大好金融人才，嘥咗啲。

林鄭選特首時，自認欠財金知識，不過有大後盾支持，包括任志剛。

睇信和全相有幻想

鷹君家族爭產，續扯起基金佬條根，睇吓邊個家族有意分家，喺市場執番啲；話說有基金佬睇緊信和黃志祥家族「全相」，呢條過江龍來自新加坡，在彼邦有遠東機構（ Far East），香港有尖沙咀置業（ 247）揸住五成一信和置業（ 83），家族首腦黃廷方七年前仙遊，據知女兒已分咗錢，兩個仔黃志祥及黃志達各佔一半老父身家，本來黃志達留守新加坡甚少沾手香港業務，然而呢十年八載香港地產水漲船高，以資產秤香港兌新加坡 65:35咁上下，咁自然要「戥」番勻佢，等星洲嗰份身家同香港呢邊平衡啲，咁兩兄弟先和睦相處，相敬如賓。一向勇猛嘅黃志祥不斷替信和置業減債，曾經公司有淨現金成兩百億，咁多茄薯會否透過派息俾母公司尖沙咀置業，從而兩兄弟正式分家，明眼人都睇到黃志祥安排三個仔入信和，早分家咪避免拗撬囉。

黃志祥三名兒子，左起黃永光、黃永耀及黃永龍皆坐鎮信和系內。

黃志祥家族的信和集團，在星、港兩地擁有不少資產，包括 The Fullerton Hotel。

黃志祥有一胞弟黃志達，留守新加坡主理當地業務。

中環寸嘴　得道之人與俗家弟子有別

工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。

有個銀行妹睇完上期講嗰支日本仔嘅——神能水，話真係好渴望飲一啖，你哋啲友唔知我玩乜，香港家陣政治及經濟皆烏煙瘴氣，唔飲番支有靈氣嘅水淨化一下心靈唔得，你睇李嘉誠間慈山寺，入面都有「大悲水」派俾信眾，你估我冇飲過咩？一支係袈裟色蓋嘅屈臣氏蒸餾水，真冇死錯人，透過慈山寺做埋屈臣氏品牌廣告推廣，另一支高級版來自台灣嘅甘露淨水，冇咁有商業元素，此乃得道之人與俗家弟子之分野。

喺溫哥華都特登喺「靈巖山寺」，帶幾支「大悲水」返香港，英文譯 Great Compassion Water，嗱，入廟拜神攞聖水最緊要俾足香油錢，唔好諗住揩返轉頭，講嘢都大聲啲，話晒當地有山有水，人傑地靈，水味道都唔同啲，最好 effect係雪一雪佢，飲咗唔成仙都成精。好似當年陳廷驊咁，印大量佛經，錄音機播佛偈，任由信眾隨便攞，隨時隨地喃嘸，弘揚佛法，有 long lasting效果，從 cost-benefit analysis，簡直係市場上的經典，絕對係一絕。