被錶商炒魷後離奇續約
方中信合十道歉：我言語失誤
54歲的方中信上月在廣州出席代言的瑞士腕錶品牌活動，數日後被對方登報宣佈終止合作聲明，死因指他言行失當、身份不符、令公司管理層及在場嘉賓尷尬等多宗罪。「炒魷」不足兩星期，雙方昨日開續約記招，一向硬漢子的方中信為吃「回頭草」臉容拘謹，向品牌承認言辭失當，事件峯迴路轉兼兒戲。
方中信（右）被「炒魷」不足兩星期昨日獲續約，出席記者會時他見到品牌高層即微笑合十。
方中信連續九年擔任一個瑞士腕錶品牌亞太區代言人，上月20日在廣州出席活動，數日後品牌突然在報章刊登終止合作聲明，指方中信犯了「言行失當，完全與其品牌代言人的身份不符，以致公司管理層及在場嘉賓尷尬萬分」、「嚴重破壞」品牌形象等罪名，其後網上流傳方中信在VIP活動時遭一名女子緊緊擁着，他尷尬地保持笑容的照片。
方中信接受訪問時表情無奈，雙手更一直緊握拳頭。
方中信上月出席品牌活動，遭VIP中女熊抱，他一臉尷尬。資料圖片
神情拘謹讀稿
以為雙方「斷交」，昨日事情卻峯迴路轉，品牌昨日在麗思卡爾頓酒店舉行與方中信代言續約儀式，重新獲「聘用」的方中信身穿灰色西裝現身，上台時他神情拘謹，見到品牌兩位高層時露出笑容兼合十，並拿出預先準備的讀稿，講出早前的事情：「希望喺呢度作出一個適當同公平嘅回應。事件係發生喺品牌答謝宴上，因為流程同溝通上出現誤會，發生一啲不愉快事件。因為我言語上失誤令到在場嘉賓同品牌尷尬，我要衷心致歉。」
之後方中信接受傳媒訪問，透露與品牌尚有兩個月合約，現正傾續約，他再次解釋之前的誤會：「我諗我只可以用一個認識咗七、八年嘅好朋友嘈完交，大家冷靜之後嘅結果。咁樣只會令大家更加了解對方。」問到他今次續約，與品牌傾了多少次，他說：「唔係傾咗好多次，大家都覺得將件事解決咗佢囉，無謂為咗一個小嘅誤會而導致大家關係唔好。」方中信自言是好有宗旨，因流程小誤會才令他「唔係咁高興」。
問到網民認為「好馬不吃回頭草」，方中信說：「多謝網友嘅支持同關心，但畢竟我哋都合作咗九年，唔想為咗一個唔係好大嘅誤會而唔開心，我哋本身關係好好，所以唔關係咪回頭草嘅事。」記者問到品牌高層發言時，未有就事件向他致歉，他表示：「係咪sorry其實唔係咁重要，好朋友一定會有拗撬，總之嗌完之後，大家會更加理解對方。」
方中信笑着與品牌總裁握手。
方中信要養妻養女，網民對他跪低認錯都深表明白。資料圖片
被熊抱唔介意
對於網上流傳一張相被一名紅衣中女熱情熊抱，方中信狀甚無奈兼尷尬，被網民推斷是「出事飯局」，他就表示：「其實嗰張相係唔關事，有時遇到熱情嘅fans，佢先會咁樣做，我自己唔介意，只要唔好咁大力就得。」有指今次事件係為續約而宣傳，方中信否認：「識我嘅人知道我一定唔會係咁，我係個好有宗旨嘅人。」再問到代言待遇，他表示不計較銀碼：「錢其實唔係咁介意，搵多啲使多啲，搵少啲使少啲，最緊要和和氣氣合作，以和為貴嘛。」但未知是否見網上太大迴響，方中信傍晚在微博留言：「別人怎麼想我控制不了，我只是希望以寬宏大量之心去解決事情！」意圖淡化事件。
採訪：盧妹
攝影：沈健程
【網民心痛】「你自己個品牌不要了」
方中信被品牌終止代言合作，網上流出他被中女VIP熊抱的照片，當時網民都明白他的「尷尬」處境，昨日他與品牌續約，即覺得他為錢「吃回頭草」。
Vinette Cheng：唉，為咗頭家，終於要跪低！
Michelle Mi：男人養家真係好辛苦㗎。
Linc Lam：原先咁多人撐你，你竟然……你自己個品牌呢？不要了？
Yeuk Yeuk：又唔係窮到冇飯開，何必要受啲咁嘅屈辱呢！
Yao Lisa：受了委屈還能認錯，忍辱負重謀取更佳回報，少一點器度與成熟是做不到的。
David Ki：為咗可欣、為咗囡囡，方中Sir今鋪要折腰了！
Monnie Chan：唉！人在江湖身不由己，只能無奈妥協了！
Hon Chiu Liu：方中信，永遠都支持你。有EQ，有性格。
|
鍾意就快D Share啦！
|
|
|