豪語錄
都係咁㗎啦 方力申
對於一向扮有深度的欄目，讀者見到這條爛題有何感想？不是一回事。
但「都係咁㗎啦」頻頻出自方力申之口，就很是一回事。曾經，他以游泳奧運代表，涉足娛樂圈，還剛入讀香港大學工商管理，聲言不與圈中女仔拍拖，不甘平凡，每項都令人充滿着期待和可塑性。那在十六年前，筆者開始接手《豪語錄》，標上《我的 year one》既寫他又寫自己，兩青年同樣對未來憧憬······
然後，運動員和天子門生身份愈來愈遠，「不與圈中女仔拍拖」變成真真假假銀幕情侶長篇肥皂劇，優雅法語叫 C'est La Vie，廣東話噏係今期條題。
錢，隨着全身投入百搭男優累積卡士當然暴增，但神奇小王子的光環褪色了，觀眾對方力申好奇沒減，卻歸入八卦緋聞的套路（阿嬌艷照和 Stephy轉性）。十六年後專訪應對得老練成熟，筆者一邊聽一邊鞭策自己再 confront，做人未必世故好。
說方力申貼地了，他始終沒承認，其實筆者「貼地」的意思——
How many roads must a man walk down/ Before you call him a man?
Walking man，踏實不再是會飛的魚。
1.後浪
方力申穿的 tee印着「 Swim Swim Swim」（並非 hard sell反正拍攝時換掉），這天先去了屯門出席籃球活動，時間緊迫只主禮而沒落場實戰，「演藝人都係咁㗎啦。」他說。
提體育明星漸少即時諗起方力申了，雖然「假假哋我仲保持兩項香港紀錄」；曹星如、李慧詩以至楊文蔚，現役可貴，微妙在，上述諸位均未正式做藝人。群情追捧傑出運動員，引發娛樂巨頭簽約，但一簽了不免再難實戰，久而久之便老派如張國強、葉尚華。
方力申倒看得開：「香港體育文化愈來愈好，大眾欣賞的是運動員本業。」
——你靚仔過曹星如嘛。
「所以曹星如受萬人景仰，我就要轉行嘞。」語氣帶點無奈。
於是老問題來了，運動員應否轉行？不轉明知生涯有限；轉呢，先收實利，但「我教師妹歐鎧淳都咁講，落實入行同拍拍廣告唔同，一定有人話鍾意你游水多過唱歌演戲。體育的成功標準很清晰，雖然辛苦卻自信；我則做了六七八年還未知什麼叫演戲，是否背對白 NG三次內完成算達標？早期又唔識應對傳媒······」
然則自覺現在得心應手？筆者倒懷念 year one專訪的青澀而充滿火花——保母笑少年小方換上衣要拉簾羞於展露飛魚身形（游水除外）；如今，「我有 job要剝衫便練六嚿腹肌。」不再惜肉如金了。
2.冇得重新開始
與天子門生身份更漸行漸遠，世人羨慕的是港大生而非港大畢業生，像未開瓶的香檳所以珍貴，「一旦投身社會便面對現實，讀書最開心。」
並非一味懷舊，而是歲月沉澱得足夠反思——本來，方力申有資格像胞弟方圓明成為專業人士。「我都想做律師，做律師好；行行一樣有機會感情失敗。」
但圈外人不用向公眾交代。
「不難面對的。我並非藝術家，雖然藝人英文 artist，不是就不是，我沒藝術家脾氣，有朋友可以只為音樂而不屑宣傳，我想繼續唱歌演戲，就要滿足埋緋聞好奇心。」
十六年前，甚至說過不與娛樂圈女仔拍拖。
「講梗係咁講㗎啦，諗梗係咁諗；發生了（太多不能盡錄），冇辦法。現在問我，我仍答想同圈外人拍拖，我仍很傳統，妳別問我過去，我也不想知妳過去，娛樂界冇得唔知，圈內人好複雜，冇得重新開始過。」
3.親疏有別
最難堪的狀況發生了（重申一次並非普通人不會而是不用交代），阿嬌與陳冠希的艷照流出、 Stephy移情同性密友。
「我講得就講，回應時不想扮受害者，我不演 man啲亦不演慘啲。家家有本難唸的經，得我自己清楚，可能我自己都唔清楚。
「我地下情咗起碼六年（指與 Stephy），做得幾好嘅，任由傳到『結咗婚離埋婚』，等大家懶理。近年看開了，緣分是我倆付出過、努力過。緣分並非句號，雖然到目前為止聯絡不多，她的事我仍關心、了解；她從身邊朋友知道我的事。」
就沒檢討是否自身出了問題麼？
「我同 Stephy一齊咗十年，十年內一定有開心唔開心，好難話因為唔鍾意哪一缺點而導致分開。」
對阿嬌呢？
「唔講嘞，始終大家唔同公司，她英皇的。」與 Stephy雖同為黃柏高門下多年，但方力申最近脫了隊喎？「算㗎（同門）總之算。」
即係親疏有別。
「唔答你。」
4.幫得就幫
更免談與何超蓮在尼泊爾機場共飲一樽水。「梗係唔講，緋聞費事講一個唔講一個。」
戥他要澄清的是與沙律。
「只能總括嚟講。最近雜誌封面，打開一張私底下約會的照片都冇，好多人唔睇內頁只睇封面，一句『都話方力申花心㗎啦』就行咗去，唔買先死！」
唔買先死，除了紙媒人感同身受，也關乎誤解一個筍盤的行情——由 Stephy、阿嬌偶像歌手，何超蓮更是賭王千金，「對象」淪為唔知乜水的奀星沙律（張沛樂），緋聞也講級數，方力申每況愈下了。
「你說被借位宣傳？人哋話，幫唔到自己但幫到人的事都要做，做個好人要這樣。」
筆者想起某歌手曾說要辦四大天王演唱會，郭富城經理人便回應：「咁，幫唔幫手吖？」
方力申續道：「你笑我行情下滑？正如前述，我本身還希望下一次會是個圈外嘅添，我鍾意、佢錫我就得，怎會計較知名度？」
5.雞死雞鳴
以為戀事就此封嘴？記者冇權逼藝人炒作，老闆可以。方力申新片《女人永遠是對的》講逃婚，擺明睇中男主角戲如人生夠噱頭。
「我演婚禮攝影師。有人咁聯想？幾得意，都係咁㗎啦，需要話題。
「現實裡我沒逃婚/被逃婚或未兌現結婚/被未兌現結婚，你問 Stephy相信她都咁答。母親節我有 send短訊給她媽咪，但真的沒求過婚。」
方力申倦了，轉移聊起家族畫廊生意——那本應更適合他、相對地冇咁煩的避風港。
「弟弟做律師兼策展人，最近展覽辦得很成功。父母仍每天返工，爸爸大病康復又回復魄力。所以我只參與出席吓活動和儲吓畫，當然升值不及樓。」
係囉，莫說買賣字畫含藝術心頭好成分，各種生意有邊行及得上炒樓賺大錢？咁點解仲有人搞生意嘅？工商管理方學士高見如何？
「鋪租閒閒哋十幾廿萬不斷升，隔籬左右執完一間開一間，只益了裝修佬。點解？就係諗住『你唔得啫或者我得』。
「亦好在咁，香港依然有商業。感情一樣，明知這人是 PK，走了一個又有新嘅埋身，佢唔錫你啫或者錫我，唔去諗根本不應搞生意、單身都唔錯。」
好在咁人類未絕種。
「我不排除下一次會是終身伴侶，但不敢俾壓力，我想 long last，可能女仔根本唔想。」
王子不敗
靚仔學界、體育界精英兼具家底，雖然口不承認，骨子裡方力申很王子的。
例如為什麼緋聞不能講一個唔講一個？好一句「總括嚟講」，何等公平的君臨天下意識。
例如問現況算否化悲憤為力量，明知筆者在「俾位」佢講專注工作，但他答：「不能說失戀令我更大動力，真心不覺得我同 Stephy的分開是失敗。」
王子可以謙虛，不可以言敗。
撰文：余家強
攝影：黃志明
攝錄：葉志明
|
鍾意就快D Share啦！
|
|
|