一臉憔悴的盲亨感到心痛，回到女兒墮海的地點接受訪問，他坦言仍未接受女兒離世的事實。每當說到女兒生前的點點滴滴，盲亨不禁悲從中來，也覺自己對子女有虧欠。
人在江湖
江湖 兒女情
父親這角色，不會因身份而有不同。
即使是在黑道打滾的江湖惡人，歷盡種種風風雨雨江湖爭鬥，在外如何窮兇極惡，面對子女時一樣舐犢情深。始終，他們回到家也是一個普通的父親。
只不過江湖人有着特別的人生，他們的子女情，可能也比較不同。
江湖父親對子女的愛，也可能比較含蓄不太明顯。
但說到底，每個父親都疼錫自己的子女，無論任何情況都可以無條件地默默付出。
半年前愛女在海中失去性命，水房猛人盲亨一直受痛苦折磨，他說是一生最痛，坦言仍未接受女兒離世的事實，腦海中每天仍泛起女兒的身影。
談到女兒自出生身體有缺陷，經歷多次手術受盡皮肉痛苦；女兒失蹤期間他發瘋的四處尋找，到殮房認屍的絕望心情仍未釋懷；自己大半生在江湖打拼而對三名子女都有虧欠。說着說着，一向強悍的盲亨也眼泛淚光。
有兩子兩女的勝和前坐館沙田 Me，認為江湖人生活顛倒太多應酬，要做一個好爸爸並不容易，他慶幸子女都能夠諒解他的處境。而自己選擇了江湖路，明白到這條路崎嶇難行，所以他對子女管教會特別嚴厲，希望他們能夠好好讀書，不要行差踏錯。
澳門賭業猛人洗米華的兒子周柏豪，自幼由嫲嫲照顧成長，嫲嫲身兼父職，將他湊大。
數年前嫲嫲患上肺炎離世，當時在英國的柏豪傷心不已。
雖然與父親洗米華相處時間不多，但柏豪仍十分欣賞父親做生意的智慧和風格。
兩人看似疏離的父子情，其實盡在不言中。
江湖人的兒女情，有血有淚有溫柔。
盲亨老了很多，站在女兒最後消失身影的海邊，他痛苦得面容扭曲。
綽號「車神」、縱橫半生的江湖猛人盲亨（原名詹昌盛，五十九歲），本有兩子一女。長子詹家圖（三十二歲）為首任妻子所生，次子詹日昇（二十二歲）和幼女詹詠嵐（十五歲），則是第二任妻子所生。
難過的父親節
可惜，幼女詠嵐去年十二月突然失蹤，數天後被發現離奇浮屍青衣碼頭海面。警方其後拘捕她的二十歲男友林嘉偉，懷疑他與案件有關。被告原被控一項誤殺罪，今年四月被改控謀殺罪，案件正排期審訊。
這個父親節，盲亨坦言很難受，「以往嘅父親節，我都有三名子女，兩子一女，依家少咗一個女，覺得欠缺咗啲嘢，覺得好傷感難過。」經歷喪女之痛，眼前的盲亨顯得一臉憔悴。他說家中的電視機，每天不停播放女兒的照片。而朋友亦造了一個印有女兒照片的人形攬枕送給他，作為父親節禮物。
過了半年，盲亨說仍未接受女兒離世的事實，愈來愈痛。「每一天個女都喺我腦海中出現，今時今日都無法忘記呢件事。心情好差，精神都差咗好多，瞓唔到覺，每日想住個女。有時諗吓諗吓，真係想跟埋個女去。」訪問地點就在女兒墮海的青衣碼頭，他望着大海，雙眼泛出片片淚光。
最疼錫幼女
三名子女中，盲亨不諱言最疼錫詠嵐，因為她的頸椎先天有問題，「我覺得佢比其他小孩子較慘，因為佢做過幾年手術，捱唔少皮肉痛苦，我覺得應該俾多一點佢，彌補上天對佢嘅唔公平。」女兒甫出世便有缺陷，但盲亨從沒怨天，「上天注定俾我呢份禮物（女兒），就算唔好我都要接受。」他慶幸，女兒也能樂觀面對。
回想女兒當日失蹤情景，盲亨還是歷歷在目，「嗰晚我去港島區參加個仔畢業禮，當時已不斷拍照 WhatsApp俾個女，畢業禮完咗亦一直聯絡佢，但佢一直無回應。」那幾天，盲亨好像發了瘋似的，失去江湖大佬的惡男形象，到處乞求人給消息，託人上網尋女，他尋遍元朗屯門每個角落打探消息，希望能找回女兒，「搵咗三日，每天下午兩點起來，一直搵到凌晨四點幾，之後到黃金海岸，買罐飲品，坐下來想想有無其他辦法，檢討有無邊個地方遺漏咗。」
這些不是回憶，是每日不斷重複的折磨。
警方來電打定輸數
盲亨肯定，女兒是和某人在一起，「我亦有派人四處搵佢嘅朋友。兩日後，就有消息話有人墮海，被送到醫院。」當時盲亨已感不安，其後真的接到警方電話，「差人話喺青衣碼頭撈起一具浮屍，同我個女特徵相似。其實嗰刻我個心已死，因為警方能夠搵我，已好大機會。」
翌日去到殮房，確認真的是女兒，盲亨情緒差點崩潰，「去到認到係我個女，嗰刻我激動得大力拍殮房玻璃，警察就叫我冷靜一點。其實我已經好冷靜，我仲未發癲。」最不想出現的一幕，終於發生了。
跟女兒玩飄移
這半年來，盲亨每有時間，便會獨個兒跑到青衣碼頭拜祭亡女，買些女兒生前喜歡的東西，跟她隔着時空聊聊天，「阿女呀，我早兩天都有來過同你講，你一直仲喺爸爸身邊，有爸爸保護你，去泳池玩都會睇住你，唔會俾人蝦。」
海面平靜，像銀幕背景浮現父女的開心片段，「你最喜歡跟我去遊車河，坐我嘅快車。」盲亨偶爾會去僻靜的地方玩飄移，讓女兒開心一番，「你未試過，當然覺得驚喜，你驚奇原來架車可以咁樣做哦。」盲亨駕車出名快，但女兒一點也不怕，「有人問你坐我車驚唔驚，你話一啲都唔驚，因為覺得爸爸駕駛技術好叻，充滿信心。」
盲亨告訴記者，兩父女以前亦不時外出「撐枱腳」，「每次帶佢她去鋸扒，佢總會刻意切幾塊俾我，我知佢想表達佢都好錫爸爸。當然我見佢咁生性，都會覺得安慰啦。」說到以前的點點滴滴，盲亨不禁會心微笑。
對三子女有虧欠
江湖人，不像一般人生活正常，多在江湖少在家。
盲亨大半生在江湖打滾，經歷不少風風雨雨，亦曾多次惹上官非進出監房，他覺得因此對子女的成長有一定影響，「對三個子女都有虧欠，會覺得有些時間停頓咗唔能夠照顧佢哋，失去一段同佢哋相處嘅時間，或者我要離開，又或其他事情。當我唔喺佢哋身邊，我幫唔到及照顧唔到子女，已經係一種虧欠。」
尤其對女兒，他覺得虧欠更大，「因為佢比其他人有點缺陷，更需要親人照顧。」他說自己一直也盡能力，給子女們最好的，希望他們可以開開心心地生活。
經歷無盡風浪，豪言天不怕地不怕的盲亨，直言女兒的離世，是他一生最大的打擊，「江湖上種種兇險，種種風風雨雨大場面，自己都經歷過亦撐得住。其實呢啲事對我來說微不足道，親人先係最重要。失去女兒，我覺得係最大傷痛。」
現在，女兒走了，就只剩下那甜蜜的回憶，和痛苦的未來。
不是太稱職
有兩子兩女（十五至二十歲）的勝和猛人沙田 Me，就說現在做父親，不能再用以前那一套，「要做到好似朋友咁，因為呢一代生活質素已唔同，佢哋嘅知識一定比我哋呢一代多，所以要盡量『聽、傾、講』，否則會令佢哋有事都唔敢講。」
電影中的江湖人，一般很少照顧子女，沙田 Me又如何呢？「我一定唔係呢種，因為所有子女畢業禮，我都有參與。就算係運動田徑親子比賽，我都有跟佢哋參加。」但他承認自己不是一個十分稱職的爸爸，「因為始終做生意多應酬，有時應承咗佢哋嘅節目，但可能生意上出現突發事件，就經常失約。」
曾經有一年兒子生日，本來計劃替他舉行生日會一起慶祝，「因為後來我喺韓國處理生意，返唔到嚟同佢搞生日會，嗰次個仔好唔開心。」他說現在一些不必要的應酬都會推掉，盡量爭取時間跟子女溝通，「陪佢哋唱歌打機，又或出去踩單車。」
對子女特別嚴厲
江湖人生活顛倒，要做一個好爸爸，他亦覺得不容易，「時間分配難一點，我哋時間無規定，唔係朝九晚五，有啲做夜總會生意嘅，夜晚做到凌晨三、四點，返到屋企沖涼瞓覺，起身已係下午三、四點，所以見子女時間會較少。」
自己選擇了江湖路，這條路並不易行，他不想子女走自己的路，所以他對子女管教會特別嚴厲，「當然驚佢哋學壞，另外會想佢哋讀多啲書。因為自己細個時無好好讀書，長大先知道知識重要，所以之後喺澳洲有再讀書。要令子女明白一定要有學識，以後做乜嘢都有用。」
但這些年來，子女有否埋怨過自己走江湖路呢？「都無嘅，因為佢哋對呢啲事都唔太清楚，佢哋係混血兒（沙田 Me妻子是澳洲人），唔係太了解香港嘅所有傳統。」
嫲嫲湊大洗米仔
澳門賭業猛人洗米華的兒子周柏豪（二十一歲），年幼時父親忙於打理賭業生意，照顧兒子的責任，便落在柏豪嫲嫲的身上。嫲嫲身兼父職，將他湊大。
「嫲嫲一直都好錫我，其實係我阿嫲湊大我，因為老豆好忙。」洗米仔周柏豪直言在自己的成長中，嫲嫲一直在他身邊支持及照顧自己，而爸爸因為工作關係，甚少了解自己的生活。「嫲嫲會管我啲功課，睇我有幾多分，睇我有無欠交功課，好多體罰，佢同我姑媽一樣，都好錫我嘅，當我欠交功課，佢就會打我。（爸爸不阻止？）佢都唔知。」柏豪的童年，與嫲嫲相處時間最多，回憶亦特別深。
嫲嫲患肺炎離世
說起嫲嫲，柏豪便滔滔不絕，「佢成日搞到我好嬲，成日俾零食我食，但佢會將啲橙同朱古力擺埋一齊，搞到我唔知點食，但而家都有啲掛住呢股味道。」一四年，嫲嫲不幸患上肺炎，「我最後見佢嘅時候，佢瞓喺 ICU，連住部機，淨係可以張開眼，想講嘢又講唔出，呢段時間佢真係好辛苦。」嫲嫲離開時，柏豪身在英國，「我好傷心，我喊咗幾個月，非常難過，我只有同英國朋友傾訴，佢哋都不停安慰我。」說到跟嫲嫲的往事，柏豪忍不住雙眼通紅。
雖然與父親洗米華相處時間不多，但柏豪仍十分欣賞父親做生意的智慧，「係佢嘅作風佢嗰團火，以及佢做生意嘅堅持。當人哋認為一件事只有單一方向時，佢就有唔同見解。佢有一句金句：『 99%人諗嘅嘢都係錯』。」柏豪承認，父親做生意的風格，對自己有影響，「覺得正確嘅，就會堅持去做。」
洗米華學英文
另外，平時樣子嚴肅的洗米華，原來做生意時十分喜歡創新，「佢出去開會傾生意時，我知道佢係好鍾意有創意、創新嘅人，呢一點我非常欣賞。」柏豪又大爆父親為了追求進步，近日正積極學習英文。
柏豪未結婚，但希望將來自己能做一個令兒子覺得驕傲的爸爸，「我會俾好多嘢子女試，俾佢哋搵一啲自己嘅興趣做，當我見到子女好專注去做一件事嘅時候，我會好感動，我會無限量咁支持佢，要佢無放棄嘅藉口，要佢明白，自己身上所有嘅嘢唔係應有嘅，佢要明白自己身處在幸福嘅世界。」
江湖路難行，江湖兒女情，也來得跟常人不一樣。
撰文：程志康、希文
攝影：韋平、王晴、海江田
news@nextdigital.com.hk
|
鍾意就快D Share啦！
|
|
|