2017年港姐首輪面試喺前日（20日）已經舉行咗，相信大家都畀一眾奇珍異獸嚇到個心都離一離，不過好在有班高顏值嘅佳麗安撫到大家弱小嘅心靈！不過話晒佢哋都係第一次成為大眾焦點，究竟私底下嘅佢哋又係點，有冇人前人後兩個樣，貨不對辦？東網就搵咗多個大家最關注嘅佳麗生活照畀大家認認人，有辣有唔辣，任君選擇呀！
Perrie 相似度100%
今年26歲來自澳洲嘅佢，面試當日一登場已經令人感到驚訝，雖然唔識廣東話，但係腳長靚樣較吸睛，IG亦有大量靚相，同真人一樣，究竟佢能唔能夠入圍，真係拭目以待喇！
Leanne 相似度100%
法國讀書返嚟參選，IG嘅相同首輪面試當日一樣，全部都見牙唔見眼，見笑容如見人，一定認得佢，都係咁燦爛呀！
Charlotte 相似度100%
同樣係26歲，做便利店店員嘅佢真係貨真價實，社交網站有唔少素顏相任睇，同面試當日嘅鮮黃色外套造型同出一轍，自信心一樣爆燈！
Kelly 相似度90%
今年20歲來自加拿大多倫多，面試時就着得密密實實，睇落似返工多過選美，個樣睇落有啲成熟。不過睇番佢平日喺社交網嘅生活照就青春好多，雖然成個唔同晒，但係好感度當堂上升！
Zoe（杜芷綾） 相似度90%
自爆曾拍過無綫劇《深宮計》，面試當日狀態大勇，笑容攞滿分。但睇番佢社交網嘅相，就影到眼細嘴大下巴兜，睇嚟佢要進修一吓自拍技巧喇！
Cherilyn（盧頴萱）相似度90%
同2014年港姐冠軍邵珮詩「撞樣」，喺中華才藝小姐攞過獎，IG好多水着相，鍾意大晒身材又愛笑，睇落冇乜PS，個樣同真人好吻合！
Sophia 相似度80%
來自浙江嘅毛小姐，面試時「龍袍」加身，IG內亦有大量晒長腿相，身材一樣咁激凸，個樣唔算差太遠，見佢畢業相同樣着咗當日件旗袍，睇嚟佢真係好鍾意件衫喎！
Flora 相似度80%
笑起上嚟有兩個「酒凹」嘅佢學歷高原來仲係律師出身，無論IG定真人，一樣面方方笑口常開！
Athena 相似度70%
2013年參加過中華文化小姐，社交網嘅相好濃妝，基本上冇乜「生活照」，面試日比較淡妝嘅佢就即刻見真章，臉黃暗啞，睇嚟要急救吓！
Elsie 相似度70%
其中一位被網友睇好嘅佢今年22歲，佢喺IG中嘅自拍照好似變咗另一個人咁，粗眼線加大眼仔，加埋個拮死人嘅下巴仔，真係令人懷疑同面試當日見到嘅係咪同一個人嚟！
Nicole（胡美貽）相似度60%
今年23歲嘅佢喺社交網上係「白富美」佼佼者，大量自拍，張張都大眼鼻高下巴尖尖，不過睇番佢面試當日，呢啲嘢似乎都消失咗，最引人注目嘅就係佢嘅大板牙喇！
|
鍾意就快D Share啦！
|
|
|