探熱針
關佢家事解開 40年父子心結 麥包七歲寄人籬下 被打捱肚餓
麥長青跟江美儀合作主持的節目《關你家事》，個案惹來網民抨擊，成為城中熱話。十五集的節目早已經拍完，身為主持的麥包，原來也有屬於自己的感人故事，在清遠出生的他，被指剋父，嫲嫲要將他送走，多年來父子關係疏離，七歲時寄人籬下被堂叔欺壓捱肚餓。家庭鬱結，最終由老豆入深切治療，昏迷五日後清醒而一筆勾銷。
被指剋父
麥包十二歲，父親才由廣州申請他來香港，跟父親一向不親近。事緣他出世時，嫲嫲指他剋父，要將他送走：「阿嫲唔要我，話我會剋死老豆，我老豆到而家都未死，條命不知幾硬。為咗呢件事，佢哋傾咗好耐，俾阿媽打工嘅契娘知道，佢覺得阿媽咁淒涼咁辛苦，將我契俾佢，然後再交番俾阿媽湊大我。我到大個先知呢件事，阿媽好叻，一直冇話我知，如果唔係我會好嬲阿嫲。大個咗，理性強過感性，況且阿嫲都走咗。」麥包說。
昏迷五日醒番
小時候父親在外工作，每月只有十多日留在鄉下的家，有年患病要在廣州留院，母親不放心他獨自留下，安排寄住堂叔家。
「食餐飯啫，揸筷子俾人鬧，俾人趕，我咪扮瞓覺，大被冚過頭，連肚餓都忍住，瑟縮喺被竇，又俾人話瞓到黃朝百晏唔起身。試過阿叔一腳踢我，我都唔敢同老豆講，佢到而家都唔知。當時隻腳爛晒生瘡，而家都有疤痕。我有嬲老豆，佢一個月返嚟十幾日，我有一段時間都唔去廣州見佢，不過呢啲係𡃁仔諗法。佢返廣州，多數都係同細佬傾偈，根本唔知細佬點對自己個仔。有時我特登出廣州見老豆，佢都會趕我出去。我記得有一幕，佢落咗閘，我隔住鐵絲網望住佢同阿叔傾偈。佢覺得細佬先係最親。」麥包記得清楚。
幾十年後父子關係終於有轉機，麥包竟然用「好好笑」來形容，他說：「有次老豆入咗深切治療五日，一直昏迷不醒，以前拍戲，我會覺得咁樣好老套，點會捉住老豆隻手講一段廢話，我就做咗呢樣嘢，都唔知邊度嚟嘅思考，同佢講『老豆你醒番，我應承唔再嬲阿叔，請佢嚟香港，請佢飲茶。』佢醒番，竟然記得叫我請阿叔飲茶。我輸咗。不過，原來已經釋懷。」他說。
無對與錯
這些年，父子關係修好，麥包會帶老人家去旅行，據麥包形容，老人家依舊盟塞，亦會發老婆脾氣，明知道不妥當但又改唔到，他說：「老人家固執，佢改唔到，如果我又係咁𡁻佢，咪又係固執變埋老人家。」
事過境遷，今年四十九歲的麥包，已經是一對仔女的父親，同樣是兒子和父親角色。他說：「做完《關你家事》，發覺冇邊個啱定錯，老豆、阿媽、老婆、仔女都有自己嘅角度，一家人最緊要係互相包容、妥協、接納、支持同鼓勵。試過我對老豆囉唆，啲仔女就會出聲，叫我唔好，如果唔係就唔睬我。佢哋好錫阿爺同長輩，我自細教佢哋要識尊卑有序。有時個女會出口勸阿爺唔好咁，幫我講埋一份。」
撰文、攝影、攝錄：娛樂組
場地提供：百德新街 El Born
|
鍾意就快D Share啦！
|
|
|