「冇一個電視或者電影嘅導演係有叫過我減肥，冇人因為覺得我肥咗醜樣囉！」1997年亞姐韓君婷當選嗰年，由亞軍「升呢」上冠軍，20年嚟事業愛情都起起伏伏(另一隻動新聞有講) ，佢嘅體重都一樣，升升跌跌，即刻去片睇吓佢嘅體形演變！連佢自己都感概承認，觀眾只記得佢嘅體形變化。其實由佢選亞姐嗰時，佢都有成120磅，但佢唔覺肥：「只不過我蘿大囉，呢個係英國人身形。」之後佢入圍決賽，自己就以地獄式減肥，每日只食一個橙、飲一盒脫脂奶減咗8磅。喺亞視之後去到大台，喺2001年着上紅色泳裝上《獎門人》節目時，佢被冠以140磅「巨躉」稱號：「我哋去日本獎門人嗰陣時呢，得120、121磅左右o架咋！」 而佢自己都話02年拍纖體廣告前係最肥，有128磅：「其實幾辛苦，我嗰陣時瞓瞓吓覺夜晚起身，死喇死喇，好似未到磅喎，咁要起身食多兩嚿雪糕先，所有有澱粉質嘅嘢都要擺入口，麵包、千層麵、蛋糕、忌廉，直頭係忌廉嗰啲唧落口嗰啲呀。」辛苦增肥，又地獄減肥：「我每一日都一定要跑14km，每一日有兩兜菜、有兩塊火腿。女人唔方便嗰幾日，你又唔小心水腫咗幾磅，大家解釋唔到嘅，就會畀幾粒無名嘅藥你。」佢話除咗咁，未試過比選美更加辛苦：「我未試過咁辛苦，又唞唔到氣，又氣促又震，又不停咁去廁所啦，最慘就係瞓唔到覺，因為不停去廁所，痾到冇得再痾喎。」佢仲因為咁而喊過兩次。比起巨躉，韓君婷更加介意「火柴人」稱號，當時她患上抑鬱症又冇即時處理：「抑鬱係因為我個blood裏面製造唔到某一啲嘢出嚟。但係點樣發現呢…就係纖體廣告之後，減肥、Stareast追唔到數又自己再執埋啦，種種呢啲問題，咪會有個domino effect囉。咁好明顯有影響工作啦，因為我喺TVB就停咗喇。」對於肥同瘦，韓君婷：「你係滿足唔到所有人，記得滿足別人不如滿足自己。如果你覺得我咁樣係肥嘅話呢，I am very happy to be 肥囉！」場地：高興
採訪：懷鈺、嵐山
攝錄：馮峰、Neo
攝影：陳慧安
|
鍾意就快D Share啦！
|
|
|